Devorning uzunligi 180 kilometrdan ortiq bo‘lib, balandligi 5,5 metrni tashkil qiladi. Uning qurilishi uchun 370 million dollar atrofida pul sarflangan.
Polsha Belarus bilan chegarada ushbu devor qurish ishlarini yakunlamoqda va shu munosabat bilan 1-iyuldan boshlab muhojirlar oqimi tufayli joriy etilgan favqulodda holatni bekor qilmoqchi. Shu bilan birga, o‘nlab chegaradagi aholi punktlarida qolishga qo‘yilgan vaqtinchalik taqiq ham bekor qilinadi.
Biroq kuzatuv kameralari o‘rnatilmagunga qadar devorga 200 metrdan kamroq masofada yaqinlashish mumkin emas.
“Imkoniyatlar har doim mavjud, hatto devorni oshib o‘tish uchun ham. Qarori qat’iy odam harakat qiladi va muvaffaqiyatga erishish uchun har doim imkoniyatga ega bo‘ladi, ammo hozircha devor samarali ko‘rinmoqda. Kameralar va kuzatuv uskunalari o‘rnatilsa, chegaradan o‘tish juda qiyin bo‘ladi” — deydi polshalik chegarachi.
Polsha devor qurishni 2021-yil oktabr oyida chegaradagi migratsiya inqirozi yomonlashganidan keyin boshlagandi. Keyinroq, Yevropa Ittifoqi davlatlari Belarus hukumatini Bryussel sanksiyalariga javoban Yaqin Sharqdan Yevropaga minglab noqonuniy muhojirlar tranzitini osonlashtirganlikda aybladi.
20 dan ortiq inson Polsha-Belorus chegarasini kesib o‘tishga urinish paytida halok bo‘ldi. Ammo huquq himoyachilari bu ko‘rsatkich ancha yuqori deb hisoblaydi va Polsha rasmiylarini ikki tomonlama standartlarda ayblaydi: Polsha rasmiylari bir tomondan ukrainalik qochqinlarni to‘siqsiz kutib olsa, ikkinchi tomondan uchinchi dunyo davlatlaridan boshpana izlovchilarning chegarada o‘lib ketishiga yo‘l qo‘ymoqda.
Izoh (0)