“Exo Moskvi” gazetasining sobiq bosh muharriri Aleksey Venediktovning “xorijiy agentlar” ro‘yxatiga kiritilishiga uning radiostansiyadagi maoshi va Rossiya Adliya vazirligi tomonidan “chet eldan moliyalashtirilgan” deb hisoblangan “Diletant” jurnalidan olgan dividendlari sabab bo‘lgan. Bu haqda uning o‘zi Telegram-kanalida ma’lum qildi.
Venediktov shu yilning 22-aprel kuni “xorijiy agent” deb e’lon qilingandi. 7-iyun kuni jurnalist bu qarorni bekor qilishni talab qilib, Rossiya Federatsiyasi Adliya vazirligi ustidan sudga murojaat qildi.
Avvalroq Adliya vazirligi siyosatshunos Yekaterina Shulmanning “Exo Moskvi” telekanalidagi gonorarini bilvosita xorijiy moliyalashtirish deb atagan, bu esa uni “xorijiy agent” deb e’lon qilishga sabab bo‘lgandi.
Rossiyaning eng mashhur radiokanallaridan biri bo‘lgan “Exo Moskvi” shu yili 3-mart kuni direktorlar kengashi qarori bilan tugatilgandi. Bundan ikki kun avval Roskomnadzor radiostansiya veb-saytini bloklab qo‘ygan va uni “ekstremizmga da’vat qilgani” uchun efirdan olib tashlagan edi.
Izoh (0)