AQSH Saudiya Arabistoni bilan jurnalist Jamol Qoshiqchi o‘ldirilganidan keyin yomonlashgan aloqalarini inflyatsiya va gaz narxining o‘sib borishi fonida yangidan boshlashga tayyor. Bu haqda CNN yuqori mansabli amerikalik amaldorlar orasidagi manbalariga tayanib xabar berdi, deb yozadi “RBK”.
“Ikkala tomon ham shunday qarorga keldiki, Yaqin Sharqda tinchlik va barqarorlikka erishish uchun biz buni yengib o‘tishimiz kerak”, — dedi telekanal suhbatdoshlaridan biri.
Manbalarga ko‘ra, AQSH prezidenti Jo Bayden ichki bozorda gaz narxini tushirish, o‘sib borayotgan inflyatsiyani sekinlashtirish va Rossiyaga qarshi cheklov choralarini ko‘rish talablari sababli katta bosim tushmoqda.
Vashington va Ar-Riyod o‘rtasidagi aloqalarning iliqlashuvi Qoshiqchining o‘ldirilishi masalasining kechirib yuborilishi yoki unutilishini bildirmaydi, deya ta’kidlamoqda manbalar, ular Bayden iyulda bo‘lib o‘tadigan uchrashuvda valiahd shahzoda bilan hodisani muhokama qilmoqchi ekanini aytmoqda.
Manbalarga qaraganda, AQSH prezidenti va valiahd shahzodaning uchrashuvi haqidagi qaror Vashington uchun og‘ir bo‘lgan, ammo tomonlar energiya manbalari bozoridagi beqarorlik fonida vaziyatga asir bo‘lmaslikka qaror qilgan. Bayden va uning milliy xavfsizlik bo‘yicha katta maslahatchilari Saudiya ARabistoni bunday sharoitlarda Qoshiqchining o‘ldirilishi maslasidan qochib uzoqqa borolmasligini aytgan.
Oq uy boshqa prioritetlarni bo‘shroq qo‘yib, xavotirli iqtisodiy tendensiyalarga urg‘u bera boshlagan. “Ular [Oq uydagilar] tashvishda, ular umidsizlikka tushgan”, — dedi manbalardan biri. Uning so‘zlariga ko‘ra, iqtisodiy vaziyat Demokratik partiyaning AQSH Vakillar palatasiga saylovda g‘alaba qozonishga umidini so‘ndirmoqda.
Jamol Qoshiqchi The Washington Post jurnalisti bo‘lgan va o‘z maqolalarida Saudiya Arabistoni hukumatini tanqid qilgan. U 2018-yilning oktabr oyida Saudiya Arabistonining Istanbuldagi elchixonasida boshi tanasidan judo qilinib o‘ldirilgan. Uning jasadi hozirgacha topilmagan.
Turkiya hukumati, AQSh Senati va Markaziy razvedka boshqarmasi jurnalistni o‘ldirish haqidagi buyruqni Saudiya Arabistonining merosxo‘r shahzodasi Muhammad ibn Salmon berganligini ma’lum qilgan. Saudiya Arabistoni hukumati esa jurnalistning o‘limini kuch tuzilmalarining shaxsiy tashabbusi deb atagan.
Jinoyatda gumonlanganlar Saudiya Arabistoni sudiga topshirilgan. 2019-yilning dekabr oyida ularning besh nafari o‘lim jazosiga hukm qilingan, yana uch nafariga tayinlangan qamoq jazosining umumiy muddati 24 yilni tashkil etgan.
2020-yilning sentabrida besh kishiga tayinlangan o‘lim jazosi jurnalistning o‘g‘illari so‘roviga asosan qamoq jazosiga almashtirilgan. 2020-yilning may oyida jurnalistning o‘g‘illari otasining o‘limida aybdor bo‘lganlarni kechirishini ma’lum qilgan. Biroq jurnalistning do‘sti Qoshiqchining o‘g‘illari aybdorlarni kechirish haqida o‘z ixtiyori bilan ma’lum qilganiga shubha bildirgan.
Avvalroq Qoshiqchining o‘ldirilishi to‘g‘risidagi hujjatdan uch kishining ismi sirli ravishda g‘oyib bo‘lgani haqida xabar berilgan.
Shuningdek, The New York Times Qoshiqchining o‘ldirilishiga aloqador shaxslar AQShda harbiy tayyorgarlikdan o‘tgani haqida yozgandi.
Bayden saylovoldi kampaniyasi chog‘ida Saudiya Arabistoni hukumatini sodir bo‘lgan voqealar uchun jamiyatdan chetlashtirishga va buning xunini to‘latishga va’da bergandi. Ayni vaqtda esa, 2022-yil iyunida davlat kotibi Entoni Blinken AQSH Saudiya Arabistoni bilan aloqalarni uzish niyatida bo‘lmaganini qayd etdi.
Izoh (0)