Saudiyalik jurnalist Jamol Qoshiqchini o‘ldirishda ayblangan besh kishi o‘lim jazosiga hukm qilindi

Saudiya Arabistonida jurnalist Jamol Qoshiqchining o‘limida ayblangan besh kishi o‘lim jazosiga hukm qilindi, deb xabar berdi Bloomberg.

Shuningdek, mazkur ishga aloqador yana uch kishi 24 yilga ozodlikdan mahrum etildi. Mahkumlar ismi oshkor etilmadi.

Saudiya Arabistoni hukumatining harakatini tanqid qilgan The Washington Post gazetasi kolumnisti Jamol Qoshiqchi 2018-yilning 2-oktabrida Istanbuldagi general konsullik binosiga kirib ketganidan so‘ng bedarak yo‘qolgan. Jurnalist u yerga Turkiya fuqarosi bilan nikohlanish uchun zarur hujjatlarni olish uchun kelgan.

Keyinroq ma’lum bo‘lishicha, jurnalist o‘ldirilib, uning tanasi bo‘laklarga bo‘lib yo‘q qilingan. Turkiya hukumat nashri “Yeni Safak” ovozli yozuvga asoslanib qiynoqlar vaqtida jurnalistning barmog‘i chopib olingani, yakunda boshi ham tanasidan judo qilinganini yozgan. Boshqa OAV ham ushbu yozuvga tayanib xabar tarqatgan, biroq turk hukumati dalillarni ommaga oshkor etmagandi.