Rossiya bosh vaziri Mixail Mishustin mamlakat BMTning Jahon sayyohlik tashkiloti (UNWTO) tarkibidan chiqishi to‘g‘risidagi hujjatni imzoladi, deb yozadi “Kommersant”. SSSR tashkilotga 1975-yilda a’zo bo‘lgan, Rossiya esa sovet ittifoqining qonuniy davomchisi sifatida uning tarkibida qolgan edi.
“‘Rossiya Federatsiyasining xalqaro shartnomalari to‘g‘risida’gi federal qonunning 36-moddasiga muvofiq, Rossiya Tashqi ishlar vazirligining ijro etuvchi hokimiyatning manfaatdor federal organlari bilan kelishilgan, Rossiya Federatsiyasining Jahon sayyohlik tashkilotidan chiqishi haqidagi taklifi qabul qilinsin”, — deyiladi huquqiy axborot portalida e’lon qilingan hujjatda.
“Rosturizm” rahbari Zarina Doguzova Rossiyaning BMT Jahon sayyohlik tashkilotidan chiqishini izohladi. Uning fikricha, Rossiya xalqaro sayyohlik maydonida qoladi hamda ichki va xalqaro turizmni rivojlantirishda davom etadi.
Doguzovaning so‘zlariga ko‘ra, Moskva ommabop xorijiy ta’til yo‘nalishlari bo‘yicha hamkasblari bilan doimiy aloqada bo‘lib turibdi.
27-aprel kuni BMT Jahon sayyohlik tashkiloti Rossiya joriy yil oxirigacha tashkilot tarkibidan chiqishini ma’lum qilgandi. Shu kuniyoq Gvatemala, Litva, Kolumbiya, Polsha, Sloveniya va Ukraina kabi bir qator mamlakatlar so‘rovidan keyin Rossiyani uning Ukrainadagi harbiy operatsiyasi tufayli UNWTO’dan chiqarish rejalashtirilgan edi. Biroq Rossiya ovoz berish yakunlarini kutmasdan, tashkilotdan ketish niyatini o‘zi ma’lum qildi.
Mavzuga doir:
- BMT Rossiya qo‘shinlarini Ukrainadan olib chiqishni talab qiluvchi rezolyutsiya qabul qildi. Unga faqat Rossiya va yana 4 ta davlat qarshi ovoz bergan
- BMT Bosh Assambleyasi Rossiyani Inson huquqlari bo‘yicha kengashdan chiqarishga ovoz berdi. Rossiya kengashdagi vakolatlarini muddatidan oldin tugatmoqchi
- “Yaqin orada tinchlikka erishish imkoniyati yo‘q”. BMT bosh kotibi Ukraina—Rossiya muzokaralari haqida
Izoh (0)