Amerika ma’muriyati mamlakatga kirib kelayotgan sayyohlar uchun koronavirusga nisbatan PZR-testdan o‘tish majburiyati bekor qilinishini e’lon qildi, deb yozadi “Interfaks”.
“AQSH kasallaiklar nazorati va profilaktikasi markazlari ilmiy ma’lumotlar asosida shunday qarorga kelishdiki, ayni vaqtda bu talabga zarurat yo‘qolmoqda”, — dedi AQSH prezidenti ma’muriyatining yuqori mansabli vakili.
Shu bilan birga, u epidemiologik vaziyat keskin yomonlashgan taqdirda, bu majburiyat qayta joriy etilishi mumkinligini ta’kidladi.
Ta’kidlanishicha, ushbu direktiva har 90 kunda qayta ko‘rib chiqilib, testdan o‘tish talabini qayta joriy qilish zaruriyati bor-yo‘qligi baholanadi.
Testdan o‘tkazish bekor qilinishini yoqlab Amerika sayyohlik sanoati vakillari faol chiqishlar qilgan edi.
“Bugungi kun AQSHga aviatashuvlarni va xalqaro safarlarni qayta tiklash yo‘lidagi yana bir muhim qadam bo‘ldi. Bayden ma’muriyatini ushbu xatti-harakatlar uchun maqtasa arziydi, natijada butun dunyodan sayyohlar qaytib kelishiga yo‘l ochiladi va AQSH sayyohlik tarmog‘ining qayta tiklanishi tezlashadi”, — deya ushbu yangilikni izohladi AQSH Sayyohlik uyushmasi bosh direktori Rojer Dou.
Uning so‘zlariga ko‘ra, majburiy testdan o‘tish talabining bekor qilinishi 2022-yil oxirigacha AQSHga qo‘shimcha 5,4 million sayyohni safarlarga xarajatlar ko‘rinishida qo‘shimcha 9 milliard dollarni jalab qilishi mumkin.
Majburiy testdan o‘tish talabi rasman 12-iyun kuni 12:01 da (Toshkent vaqti bilan 21:01 da) bekor bo‘ladi.
Eslatib o‘tamiz, 1-iyundan boshlab Turkiyaga kirish uchun sayyohlardan PZR-testi yoki tezkor antigen testining salbiy natijalarini ko‘rsatish talab etilmaydigan bo‘ldi. Italiya ham mamlakatga kirish uchun barcha antikovid cheklovlarini bekor qilgandi, Ispaniya esa emlanmagan sayyohlarning mamlakat hududiga kirishiga ruxsat bergan. Avvalroq yana to‘qqizta davlat, jumladan, Isroil, Indoneziya, Marokash, Avstriya, Vyetnam, Malayziya, Tailand, Armaniston, Qirg‘iziston PZR-testining salbiy natijasini taqdim etish tartibini bekor qilib, kirish talablarini yengillashtirgan edi.
Izoh (0)