Braziliya prezidenti Jair Bolsonaru supermarketlar rahbarlarini asosiy oziq-ovqat mahsulotlarining narxini pasaytirishga chaqirdi. Bu haqda u Braziliya Supermarketlar assotsiatsiyasi forumida so‘zlagan nutqida ma’lum qildi, deb xabar bermoqda Valor Econômico gazetasi.
“Men oziq-ovqat savatini ishlab chiqarish zanjiriga aloqador barchani aholining muhim qismiga, ayniqsa uning eng kamtarona hayot kechiradigan vakillariga yordam berishimiz uchun imkon qadar kam daromad bilan ishlashga chaqiraman”, — dedi Bolsonaru.
Uning ta’kidlashicha, “qiyin paytlarda Braziliyaning barcha fuqarolari birgalikda harakat qilishlari zarur”.
Folha de S.Paulo nashrining Braziliya inflyatsiya indeksi (IPCA) ma’lumotlariga tayangan holda xabar berishicha, so‘nggi 12 oy davomida inflyatsiya ko‘rsatkichi 11,73 foizni tashkil etgan, oziq-ovqat narxlari hamon o‘sib bormoqda. Masalan, aprel oyida inflyatsiya 2,06 foizni, may oyida 0,48 foizni tashkil qildi.
Braziliya iqtisodiyot vaziri Paulo Gedes mamlakat hukumati Ukrainadagi urushning iqtisodiy ta’sirini minimallashtirish uchun qo‘lidan kelgan barcha ishni qilganini aytib, jumladan, 200 million braziliyalik uchun soliqlarni kamaytirishga erishilganini ta’kidlagan.
Izoh (0)