АҚШ Саудия Арабистони билан журналист Жамол Қошиқчи ўлдирилганидан кейин ёмонлашган алоқаларини инфляция ва газ нархининг ўсиб бориши фонида янгидан бошлашга тайёр. Бу ҳақда CNN юқори мансабли америкалик амалдорлар орасидаги манбаларига таяниб хабар берди, деб ёзади «РБК».
«Иккала томон ҳам шундай қарорга келдики, Яқин Шарқда тинчлик ва барқарорликка эришиш учун биз буни енгиб ўтишимиз керак», — деди телеканал суҳбатдошларидан бири.
Манбаларга кўра, АҚШ президенти Жо Байден ички бозорда газ нархини тушириш, ўсиб бораётган инфляцияни секинлаштириш ва Россияга қарши чеклов чораларини кўриш талаблари сабабли катта босим тушмоқда.
Вашингтон ва Ар-Риёд ўртасидаги алоқаларнинг илиқлашуви Қошиқчининг ўлдирилиши масаласининг кечириб юборилиши ёки унутилишини билдирмайди, дея таъкидламоқда манбалар, улар Байден июлда бўлиб ўтадиган учрашувда валиаҳд шаҳзода билан ҳодисани муҳокама қилмоқчи эканини айтмоқда.
Манбаларга қараганда, АҚШ президенти ва валиаҳд шаҳзоданинг учрашуви ҳақидаги қарор Вашингтон учун оғир бўлган, аммо томонлар энергия манбалари бозоридаги беқарорлик фонида вазиятга асир бўлмасликка қарор қилган. Байден ва унинг миллий хавфсизлик бўйича катта маслаҳатчилари Саудия АРабистони бундай шароитларда Қошиқчининг ўлдирилиши масласидан қочиб узоққа боролмаслигини айтган.
Оқ уй бошқа приоритетларни бўшроқ қўйиб, хавотирли иқтисодий тенденцияларга урғу бера бошлаган. «Улар [Оқ уйдагилар] ташвишда, улар умидсизликка тушган», — деди манбалардан бири. Унинг сўзларига кўра, иқтисодий вазият Демократик партиянинг АҚШ Вакиллар палатасига сайловда ғалаба қозонишга умидини сўндирмоқда.
Жамол Қошиқчи The Washington Post журналисти бўлган ва ўз мақолаларида Саудия Арабистони ҳукуматини танқид қилган. У 2018 йилнинг октябрь ойида Саудия Арабистонининг Истанбулдаги элчихонасида боши танасидан жудо қилиниб ўлдирилган. Унинг жасади ҳозиргача топилмаган.
Туркия ҳукумати, АҚШ Сенати ва Марказий разведка бошқармаси журналистни ўлдириш ҳақидаги буйруқни Саудия Арабистонининг меросхўр шаҳзодаси Муҳаммад ибн Салмон берганлигини маълум қилган. Саудия Арабистони ҳукумати эса журналистнинг ўлимини куч тузилмаларининг шахсий ташаббуси деб атаган.
Жиноятда гумонланганлар Саудия Арабистони судига топширилган. 2019 йилнинг декабрь ойида уларнинг беш нафари ўлим жазосига ҳукм қилинган, яна уч нафарига тайинланган қамоқ жазосининг умумий муддати 24 йилни ташкил этган.
2020 йилнинг сентябрида беш кишига тайинланган ўлим жазоси журналистнинг ўғиллари сўровига асосан қамоқ жазосига алмаштирилган. 2020 йилнинг май ойида журналистнинг ўғиллари отасининг ўлимида айбдор бўлганларни кечиришини маълум қилган. Бироқ журналистнинг дўсти Қошиқчининг ўғиллари айбдорларни кечириш ҳақида ўз ихтиёри билан маълум қилганига шубҳа билдирган.
Аввалроқ Қошиқчининг ўлдирилиши тўғрисидаги ҳужжатдан уч кишининг исми сирли равишда ғойиб бўлгани ҳақида хабар берилган.
Шунингдек, The New York Times Қошиқчининг ўлдирилишига алоқадор шахслар АҚШда ҳарбий тайёргарликдан ўтгани ҳақида ёзганди.
Байден сайловолди кампанияси чоғида Саудия Арабистони ҳукуматини содир бўлган воқеалар учун жамиятдан четлаштиришга ва бунинг хунини тўлатишга ваъда берганди. Айни вақтда эса, 2022 йил июнида давлат котиби Энтони Блинкен АҚШ Саудия Арабистони билан алоқаларни узиш ниятида бўлмаганини қайд этди.
Изоҳ (0)