Rossiya Turkmanistonning asosiy iqtisodiy sheriklaridan biri hisoblanadi. O‘tgan yili ikki tomonlama tovar aylanmasi 865 million dollarni tashkil etgan bo‘lsa, joriy yil birinchi choragi yakunlariga ko‘ra, o‘zaro savdo yana 45 foizga o‘sdi. Bu haqda Rossiya prezidenti Vladimir Putinning turkmanistonlik hamkasbi Serdar Berdimuhamedov bilan muzokaralaridan keyin tarqatilgan qo‘shma bayonotda aytiladi, deb yozadi Anadolu agentligi.
Uchrashuvda alohida e’tibor energetika mavzusiga qaratildi, ikkala tomon ham Rossiya va Turkmanistonning tegishli idoralari liniyasi bo‘yicha hamkorlik o‘rnatish, ishbilarmonlik doiralarining o‘zaro manfaatli tashabbuslarni amalga oshirishni davom ettirishga qaratilgan harakatlarini qo‘llab-quvvatlashga qiziqish bildirdi.
Sanoat kooperatsiyasini yanada rivojlantirish kabi muhim mavzuga ham to‘xtab o‘tildi, bir qancha yirik qo‘shma loyihalar muvaffaqiyatli amalga oshirilayotgani qayd etildi.
Ikkala tomon ham qurilish sohasida yangi katta ko‘lamli tashabbuslarni amalga oshirishga tayyorligini bildirdi.
Turkmaniston yetakchisi bilan muzokaralar chog‘ida Putin Rossiya Turkmanistonning neytral (betaraflik) maqomiga hurmat bilan munosabatda bo‘lishini aytgandi.
Prezidentning so‘zlariga ko‘ra, Moskva, shuningdek, Ashxobodning Yevrosiyo iqtisodiy ittifoqi va Shanxay hamkorlik tashkiloti liniyasi bo‘yicha rivojlanayotgan integratsiya jarayonlariga o‘sib borayotgan qiziqishini ma’qullaydi.
Putin qayd etishicha, “Markaziy Osiyo beshligi plyus Rossiya” formatidagi hamkorlik ham istiqbolli bo‘lib ko‘rinmoqda.
Shuningdek, 10-iyun, juma kuni Putin Berdimuhamedov bilan Kremlda bo‘lib o‘tgan uchrashuvda ikki mamlakat aloqalarini rivojlantirish haqida hujjat imzolanishini e’lon qildi.
“Bugun o‘zaro aloqalarimizga taalluqli bo‘lgan juda muhim hujjatni imzolaymiz”, — dedi Rossiya prezidenti.
U Turkmaniston bilan aloqalarni “haqiqatda strategik” deb atadi.
“Barcha yo‘nalishlar bo‘yicha aloqalarni rivojlantiryapmiz, ular haqiqatda, rasman emas, aslida ham strategik ekanini qayd etish kishini juda quvontiradi”, — dedi Putin.
Eslatib o‘tamiz, may oyida Rossiya prezidenti Vladimir Putin Turkmaniston rahbari Serdar Berdimuhamedovni Do‘stlik ordeni bilan taqdirlash to‘g‘risida farmon imzolagan edi. Kremldagi uchrashuvda esa uni shaxsan topshirdi.
Izoh (0)