O‘zbekiston tovar-xomashyo birjasi shakarga nisbatan taklifni ko‘tarish maqsadida xorijiy hamkorlar bilan muzokaralar olib bormoqda. Bu haqda 10-iyun kuni AOKAda o‘tkazilgan matbuot anjumanida so‘z yuritildi, deya xabar bermoqda “Daryo” muxbiri.
“Yanvar-iyun oylarida 200 ming tonnadan ziyod shakar birja savdolari orqali sotildi. Har yili mavsumiy talab kuzatiladi va shu vaqtda shakar narxida o‘sish bo‘ladi. Ushbu holat joriy yil ham kuzatilyapti.
Bugungi kunda birja savdolariga kuniga 2 ming tonna shakar qo‘yilmoqda va barchasi sotilmoqda. Demak, haqiqatan talab oshgan. Savdoda ishtirok etayotgan xaridorlar soni ham may—iyun oyida 38 foizga ko‘tarildi.
Hozir eng asosiy maqsad — taklifni ko‘tarish. Buning uchun biz xorijiy savdo maydonchalari orqali import shakarni ham birja savdolariga qo‘yish masalasida Rossiya, Belorusiya kabi davlatlardagi hamkorlarimiz bilan muzokaralar olib boryapmiz. Agar mana shunga erishadigan bo‘lsak, taklif darajasi oshadi va narxlar barqarorlashadi”, — deydi O‘zbekiston tovar-xomashyo birjasi axborot xizmati rahbari Hikmatulla Tillaboyev.
Mavzuga doir:
- O‘zbekistonda shakar narxida nega o‘sish kuzatilmoqda? Monopoliya qo‘mitasi rasmiysi izoh berdi
- “Chorsu” bozorida shakarga navbat kuzatilmoqda. Bozor rahbariyati esa shakar yetarli ekanini, odamlar vahimaga tushmasligi lozimligini aytmoqda (video)
- O‘zbekistonda va boshqa mamlakatlarda shakar narxi qancha?
Izoh (0)