Shavkat Mirziyoyev 10-iyun kuni Birlashgan Arab Amirliklarining hukumat ishlari bo‘yicha vaziri Muhammad bin Abdulloh al-Gargaviy boshchiligidagi delegatsiyani qabul qildi. Bu haqda Prezident matbuot xizmati xabar qildi.
Qayd etilishicha, uchrashuvda O‘zbekiston va BAA o‘rtasidagi ko‘p qirrali hamkorlikni rivojlantirish va boyitishning dolzarb masalalari ko‘rib chiqilgan. Vazir Muhammad al-Gargaviy davlat rahbariga Amirliklar prezidenti Shayx Muhammad al-Nahayon va BAA bosh vaziri, Dubay amirligi hokimi Shayx Muhammad al-Maktumning salomi va tilaklarini yetkazgan.
Birlashgan Arab Amirliklari hukumati O‘zbekistonda amalga oshirilayotgan yangilanishlar dasturini har tomonlama qo‘llab-quvvatlayotgani, uning samarali ro‘yobga chiqarilishida zarur ko‘makni ko‘rsatishga tayyorligi ta’kidlangan. Muzokaralar chog‘ida davlat boshqaruvi samaradorligini oshirish borasidagi, “Bir million dasturchi” dasturi va Ijtimoiy-iqtisodiy islohotlar akseleratori faoliyati doirasidagi hamkorlikning amaliy natijalari qayd etilgan.
Innovatsiyalar va sun’iy intellekt sohalarida hamkorlik qilish, muhim tarmoqlarni isloh qilish, davlat boshqaruvini yanada takomillashtirish va zamonaviy kadrlarni tayyorlash yuzasidan muloqotni kengaytirish uzoq muddatli sheriklikning yangi yo‘nalishlari sifatida belgilangan. Qabul qilingan qarorlar va uchrashuvda ilgari surilgan tashabbuslarni to‘liq amalga oshirish bo‘yicha qo‘shma “yo‘l xaritasi”ni qabul qilishga kelishib olingan.
Izoh (0)