Surxondaryo viloyati hokimi To‘ra Bobolovning aytishicha, viloyat va tuman hokimliklarining axborot xizmati rahbarlari hokimlarning o‘ng qo‘li bo‘lishi kerak. Bu haqda u “Daryo” bilan suhbatda gapirib berdi.
“Hokimiyatlardagi, shuningdek tuman hokimliklaridagi matbuot kotiblari hokimning o‘ng qo‘li bo‘lishi kerak. Va ularga barcha shart-sharoitlar yaratib berilishi lozim. Boisi, xohlaysizmi yo‘qmi matbuot kotiblari barcha OAV vakillari bilan muloqot qiladi. Ular bilan axborot almashadi. Shunday paytda matbuot kotiblarida ham sifatli materiallar tayyorlashga imkoniyat va sharoit bo‘lishi lozim. Qolaversa, matbuot kotiblari OAV vakillari, xususan blogerlar bilan ham muloqot qilib, muammoni to‘g‘ridan to‘g‘ri hokimga yetkazishi kerak”, — dedi viloyat hokimi To‘ra Bobolov.
Surxondaryo hokimining aytishicha, matbuot kotiblari qanchalik tezkor bo‘lsa, hokim ham shuncha ko‘p axborotlardan boxabar bo‘lib turadi.
“Hokimning matbuot kotibi hokim ko‘rmay qolayotgan yangiliklarni o‘z vaqtida hokimga yetkazib turishi kerak. U nafaqat o‘zining tumanidagi, qo‘shni tumanlardagi yangiliklarni ham hokimga yetkazib, boxabar qilib turishi kerak”, — deydi To‘ra Bobolov.
Surxondaryo hokimining qo‘shimcha qilishicha, u matbuot kotibiga barcha shart-sharoitlarni yaratib bergan.
“Xizmat avtomobilimiz Tracer rusumli avtomobil bo‘lib, alohida haydovchi ham ajratilgan. Shuningdek, barcha texnikalarimiz — fotoapparat, zamonaviy kompyuterlarimiz bor. Hokimlik binosida qabulxonaga yaqin joydan alohida xona ajratilgan bo‘lib, barcha jihozlar bilan ta’minlangan”, — deydi To‘ra Bobolovning matbuot kotibi Murodbek Davlatov.
Murodbek Davlatovning ma’lumot berishicha, viloyatda faoliyat yurituvchi shahar va tuman hokimlari matbuot kotiblarining ikki nafarida xizmat avtomobili bor.
“Qolganlariga farmoyish bilan mashina biriktirilgan, ammo alohida avtomobil ajratilmagan”, — deydi To‘ra Bobolovning matbuot kotibi.
Surxondaryo hokimi hududdagi hokimliklar matbuot kotiblarining barchasini tanishini, ular muammoni to‘g‘ridan to‘g‘ri viloyat hokimiga yetkaza olishi mumkinligini ta’kidlamoqda.
“Barcha tuman va shahar hokimlarining matbuot kotiblarini yaxshi taniyman. Hududlarga borganimda ular bilan alohida gaplashaman. Muammolari bo‘lsa, eshitib hal qilaman. Tan olishimiz kerak, Surxondaryoda matbuot kotiblariga yetarlicha shart-sharoit yaratib bermagan hokimlar bor. Endi ularni alohida sanamayman. Xulosa qilishadi degan umiddaman”, — deydi To‘ra Bobolov.
Mavzuga doir:
Izoh (0)