Polsha qurol yetkazib berish bo‘yicha so‘nggi 30 yil ichidagi eng yirik shartnomalardan birini tuzadi. Qurol-yarog‘ Ukrainaga yo‘naltiriladi, deb yozadi Meduza Polsha bosh vaziri Mateush Moravetskiyning Facebook’dagi postiga tayanib.
“Biz so‘nggi 30 yil ichidagi eng yirik qurol-yarog‘ shartnomalaridan birini imzolayapmiz, u ukrainlar Rossiyadan himoyalana olishi uchun ularga qurol sotish to‘g‘risida. Biz sotayotgan qurol-yarog‘ tekshiruvdan o‘tgan, u jang maydonida juda samarali bo‘lishini biz bilamiz”, — deb yozdi Moravetskiy.
Shartnoma qiymati 2,7 milliard Polsha zlotiysi (taxminan 630 million dollar)ga teng, deb yozadi “Ukrinform” bosh vazir o‘rinbosari, Polsha davlat aktivlari vaziri Yatsek Sasinga tayanib. Polsha bosh vaziri so‘zlariga ko‘ra, qurol-yarog‘ sotib olish uchun mablag‘ni Ukraina qisman Yevroittifoqdan oladi.
Moravetskiy shartnoma bo‘yicha Ukraina qanday qurolga ega bo‘lishiga aniqlik kiritmadi. Bir hafta avval Polshaning Dziennik nashri manbalarni keltirmasdan, Kiyev va Varshava yaqin oylarda 60 ta Krab o‘ziyurar artilleriya qurilmalarini yetkazib berish bo‘yicha shartnoma tuzgani haqida xabar bergandi (avval yetkazilgan 18 taga qo‘shimcha tarzda).
Krab o‘ziyurar gaubitsalari Polshaning Huta Stalowa Wola qurol-yarog‘ kompaniyasi tomonidan ishlab chiqariladi. Krab eng uzog‘i bilan 40 kilometr masofaga o‘q ota oladi.
Aprel oxirida Polsha hukumati mamlakat Ukrainaga taxminan 1,6 milliard dollarlik harbiy texnika yetkazib berganini ma’lum qilgandi.
Izoh (0)