Польша қурол-яроғ етказиб бериш бўйича сўнгги 30 йилдаги энг йирик шартнома тузилганини маълум қилди. Қурол Украинага юборилади

Польша қурол етказиб бериш бўйича сўнгги 30 йил ичидаги энг йирик шартномалардан бирини тузади. Қурол-яроғ Украинага йўналтирилади, деб ёзади Meduza Польша бош вазири Матеуш Моравецкийнинг Facebook’даги постига таяниб.

«Биз сўнгги 30 йил ичидаги энг йирик қурол-яроғ шартномаларидан бирини имзолаяпмиз, у украинлар Россиядан ҳимоялана олиши учун уларга қурол сотиш тўғрисида. Биз сотаётган қурол-яроғ текширувдан ўтган, у жанг майдонида жуда самарали бўлишини биз биламиз», — деб ёзди Моравецкий.

Шартнома қиймати 2,7 миллиард Польша злотийси (тахминан 630 миллион доллар)га тенг, деб ёзади «Укринформ» бош вазир ўринбосари, Польша давлат активлари вазири Яцек Сасинга таяниб. Польша бош вазири сўзларига кўра, қурол-яроғ сотиб олиш учун маблағни Украина қисман Евроиттифоқдан олади.

Моравецкий шартнома бўйича Украина қандай қуролга эга бўлишига аниқлик киритмади. Бир ҳафта аввал Польшанинг Dziennik нашри манбаларни келтирмасдан, Киев ва Варшава яқин ойларда 60 та Краб ўзиюрар артиллерия қурилмаларини етказиб бериш бўйича шартнома тузгани ҳақида хабар берганди (аввал етказилган 18 тага қўшимча тарзда).

Краб ўзиюрар гаубицалари Польшанинг Huta Stalowa Wola қурол-яроғ компанияси томонидан ишлаб чиқарилади. Краб энг узоғи билан 40 километр масофага ўқ ота олади.

Апрель охирида Польша ҳукумати мамлакат Украинага тахминан 1,6 миллиард долларлик ҳарбий техника етказиб берганини маълум қилганди.