BMT Bosh kotibining matbuot kotibi Stefan Dyujarrik 7-iyun kuni o‘takazilgan brifingda “BMTda Kiyevning Rossiya Ukraina g‘allasini eksport qilayotgani haqidagi ayblovini tasdiqlaydigan ma’lumotlar yo‘q”ligini ma’lum qildi.
“Birlashgan Millatlar Tashkiloti rasmiylari ommaviy axborot vositalaridagi xabarlarni ko‘rdi va bu masalani Jahon oziq-ovqat dasturidagi (World Food Programm) hamkasblari bilan muhokama qildi”, - deydi Dyujarrik. U “ularda bu ayblovni tasdiqlashning imkoni yo‘q” deya qo‘shimcha qilgan.
Dyujarrikning ta’kidlashicha, BMT butun dunyodagi odamlarning ehtiyojlarini qondirish uchun Qora dengiz bo‘ylab erkin oziq-ovqat savdo zonasini yaratish tarafdori.
30-may kuni Ukraina qishloq xo‘jaligi vaziri o‘rinbosari Taras Visotskiy Rossiya Donetsk, Lugansk, Xerson, Zaporojye va Xarkov viloyatlaridan olingan yarim million tonnaga yaqin donni eksport qilganini ma’lum qildi. Ukraina Agrar siyosat va oziq-ovqat vaziri Nikolay Solskiy ham Rossiya tomonini don o‘g‘irlashda aybladi.
Bundan bir kun oldin esa New York Times AQSh may oyi o‘rtalarida 14 davlatga (asosan Afrika mamlakatlari) Rossiya “o‘g‘irlangan Ukraina donini” sotishga urinyotgani haqida ogohlantirish yuborgani haqida xabar berdi. Bir necha davlat vakillarining NYT’ga ma’lum qilishicha, Vashington ulardan noqonuniy yo‘llar bilan olingan Ukraina donini sotib olishga ruxsat bermaslikni so‘ragan.
Birlashgan Millatlar Tashkiloti Ukraina portlarida millionlab tonna don to‘planganini, biroq harbiy harakatlar tufayli ularni olib chiqa bo‘lmasligini aytdi — bunga Rossiya kuchlari tomonidan portlarning blokada qilingani to‘sqinlik qilmoqda. AQSh va boshqa hukumatlarning fikricha, Rossiyaning Ukrainadagi harakatlari oziq-ovqat inqirozini yanada kuchaytirdi. Italiya tashqi ishlar vaziri Luidji Di Mayo don yetkazib berish muammolari davom etsa, “oziq-ovqat urushi” xavfi yuz berishidan ogohlantirdi.
Moskva, o‘z navbatida, G‘arbning “noqonuniy harakatlari” don yetkazib berishning blokada qilinishiga olib kelganini, don eksportini qayta tiklash uchun ularni (sanksiyalarni) bekor qilish kerakligini ta’kidlamoqda. Rossiya hukumati, shuningdek, Ukraina portlari va ular yonida joylashgan akvatoriyalar (suv ombori yuzasi hamda suv maydonlari) minalanganini va savdo kemalari portlatilishi mumkinligini ham bildirgan. May oyi oxirida Rossiya Mudofaa vazirligi Qora va Azov dengizlaridagi portlardan chet el kemalarining chiqishi uchun yo‘laklar ochilishini e’lon qilgandi. Shu bilan birga, Vladimir Putin “don ortilgan kemalarning to‘siqsiz o‘tishini osonlashtirishga tayyorligini” ham ma’lum qilgan edi.
Izoh (0)