Ukraina oliy Radasi Rossiya “natsizm ustidan g‘alaba qozondi” deyish endi noto‘g‘riligini bildirdi va mamlakatni natsistlar Germaniyasiga qiyosladi

Ukraina oliy Radasi Ikkinchi jahon urushi tugaganiga 77 yil to‘lishi munosabati bilan qaror qabul qildi va unda Rossiyaga “natsizm ustidan g‘alaba qozongan” deya ta’rif berib bo‘lmasligi qayd etilgan.

Hujjatda Ukraina xalqining Gitler ittifoqiga qarshi va natsistlar Germaniyasi egallagan yerlarni ozod qilishdagi roli alohida qayd etilgan.

Shuningdek, oliy Rada tasdiqlagan qarorda Rossiya federatsiyasining Ukrainadagi jinoyatlariga barham berish zarurligi, Putin rejimi sud qilinishi va rivojlangan dunyoning sayi-harakatlari bilan natsistlar Germaniyasi kabi jazolanishi kerakligi ta’kidlangan.

Shuningdek, Rada deputatlari AQSH kongressiga Rossiyani terrorizmga homiylik qiladigan davlat sifatida tan olish haqidagi murojaatni ham qabul qilgan.

Bundan tashqari 3-may kuni bo‘lib o‘tgan Rada yig‘ilishida parlamentariylar oldida Buyuk Britaniya bosh vaziri Boris Jonson videokonferens aloqa orqali murojaat qilgan, shuningdek, Ukraina prezidenti Vladimir Zelenskiy urush boshlanganidan beri ilk bora shaxsan ishtirok etib, nutq so‘zlagan.