Ukrainada biznesni rivojlantirish va yevrointegratsiyani tezlashtirish uchun ingliz tiliga ish yuzasidan muloqot tili maqomini berish imkoniyati muhokama qilinmoqda. Ushbu masala hukumat yig‘ilishida ko‘rib chiqilgan, deb yozadi “Kommersant” mamlakat bosh vaziri Denis Shmigalga tayanib.
Sohaga aloqador vazirliklarga takliflarni ishlab chiqish va tegishli hujjatlarni rasmiylashtirish topshirilgan. “Ingliz tili bugungi kunda butun sivilizatsiyalashgan dunyoda ishbilarmonlik bo‘yicha muloqotda qo‘llaniladi, Ukrainada unga bunday maqomning berilishi biznesni rivojlantirish, investitsiyalarni jalb qilish va yevrointegratsiyani tezlashtirish imkonini beradi”, — deb yozdi Shmigal o‘z Telegram-kanalida.
2019-yildan buyon Ukrainada “Ukrain tilining davlat tili sifatida mavjud bo‘lishini ta’minlash to‘g‘risida”gi qonun amal qilib keladi. U ukrain tilining shaxsiy muloqot va diniy marosimlardan tashqari, hayotning deyarli barcha sohalarida qo‘llanilishini ko‘zda tutadi.
Avvalroq Ukrainaning Rossiya qo‘shinlari tomonidan egallab olingan Xerson viloyatida ukrain tili bilan bir qatorda rus tili ham davlat tili maqomini olishi ma’lum qilingandi.
Izoh (0)