Беларусь Қуролли кучларида барча бўлинмалар ва барча тоифадаги ҳарбий хизматчилар иштирокида тинч даврдан ҳарбий даврга ўтиш бўйича машғулотлар бошланди, деб ёзади «Коммерсантъ». Уларда неча киши қатнашаётгани ва қанча давом этиши ҳақида республика Мудофаа вазирлиги маълумот бергани йўқ.
«Машғулотларнинг умумий йўналиши барча тоифадаги ҳарбий хизматчилар, бўлинмалар, ҳарбий қисмлар, қўшилмалар, ҳарбий бошқарма органлари билан тинч даврдан ҳарбий даврга ўтиш бўйича тадбирларни уюшган ҳолда бажариш бўйича кетма-кет машғулотлар мажмуасини ўтказишдан иборат», — дейилади идора хабарида.
Ҳарбий давр — иккита давлат, давлатлар гуруҳи ёки бўлмаса битта давлат ичидаги сиёсий кучлар ўзаро уруш ҳолатида бўлиб турадиган давр.
4 май куни Беларусь армиясида жавоб кучларини кутилмаганда текшириш бошланди, унинг доирасида шахсий таркибнинг эҳтимолий инқирозли вазиятлар юзага келишига тезкорлик билан жавоб қайтаришга шайлиги ва имконияти баҳоланиши айтилди.
Шунингдек, ушбу тадбирлар ўқув машғулотлари бўлиб, бошқа мамлакатлар учун хавф туғдирмаслиги таъкидланди. «Ғарб тинч ухлаши мумкин», — деганди Лукашенко.
Текширув бир нечта босқичларда амалга оширилмоқда. Иккинчиси 10 май куни, кейингиси 23 май куни бошланди. Қуролли кучлар, хусусан, қурол-яроғни, ҳарбий қисмларда узоқ вақт сақланадиган жанговар ва махсус техникани текширмоқда.
Шунингдек, 10 май куни Беларусь Украина билан чегарага «махсус операция куҳcлари» жойлаштирилганини эълон қилди. Май охирида эса Александр Лукашенко мамлакатда халқ лашкари тузиш вазифасини қўйди. Ҳамда у Беларусь қуролли кучларида Украина йўналишида (жанубий йўналишда) тезкор қўмондонлик тузилишини маълум қилди.
Мавзуга доир:
Изоҳ (0)