Samarqandda uyida 404 tup, Xorazmda esa 532 tup ko‘knor yetishtirayotgan shaxslar aniqlandi

Xorazm viloyati bojxona boshqarmasi Kontrabandaga qarshi kurashish bo‘limi xodimlari davlat xavfsizlik xizmati va ichki ishlar idoralari bilan hamkorlikdagi tezkor tadbirda qonunga xilof ravishda ko‘knor yetishtirayotgan shaxsning qilmishlarini fosh qildi.

Urganch tumanidagi mahallalardan birida istiqomat qilayotgan shaxsning xonadoni belgilangan tartibda ko‘zdan kechirilganda, bu yerdagi tomorqada va bog‘da jami 532 tup ko‘knor giyohvandlik o‘simligi parvarishlanayotganligi aniqlandi.

Shunday holat Samarqand viloyatida ham fosh qilindi.

Kontrabandaga qarshi kurashish bo‘limi tezkor xodimlarining davlat xavfsizlik xizmati bilan hamkorlikda Oqdaryo tumanida o‘tkazilgan tezkor tadbirda fuqarolardan birining xonadonida yetilib, boshoqlagan 404 tup ko‘knori parvarish qilinayotgani fosh qilindi.

Bojxona axborot xizmatining ma’lum qilishicha, 2022-yil 5 oyi davomida bojxonachilar 164 ta qonunbuzarlik holatlarida 547 kilogramm ziyod giyohvandlik vositalarining noqonuniy aylanmasiga chek qo‘ygan.