Хоразм вилояти божхона бошқармаси Контрабандага қарши курашиш бўлими ходимлари давлат хавфсизлик хизмати ва ички ишлар идоралари билан ҳамкорликдаги тезкор тадбирда қонунга хилоф равишда кўкнор етиштираётган шахснинг қилмишларини фош қилди.
Урганч туманидаги маҳаллалардан бирида истиқомат қилаётган шахснинг хонадони белгиланган тартибда кўздан кечирилганда, бу ердаги томорқада ва боғда жами 532 туп кўкнор гиёҳвандлик ўсимлиги парваришланаётганлиги аниқланди.
Шундай ҳолат Самарқанд вилоятида ҳам фош қилинди.
Контрабандага қарши курашиш бўлими тезкор ходимларининг давлат хавфсизлик хизмати билан ҳамкорликда Оқдарё туманида ўтказилган тезкор тадбирда фуқаролардан бирининг хонадонида етилиб, бошоқлаган 404 туп кўкнори парвариш қилинаётгани фош қилинди.
Божхона ахборот хизматининг маълум қилишича, 2022 йил 5 ойи давомида божхоначилар 164 та қонунбузарлик ҳолатларида 547 килограмм зиёд гиёҳвандлик воситаларининг ноқонуний айланмасига чек қўйган.
Изоҳ (0)