Transport vaziri o‘rinbosari Jasurbek Choriyev 3-iyun kuni Mo‘g‘uliston yo‘llar va transportni rivojlantirish vazirligi Fuqaro aviatsiyasini rivojlantirish departamenti Bosh direktori Munxtuya Chimeddorj xonim bilan uchrashdi. Bu haqda Transport vazirligi xabar qildi.
Qayd etilishicha, uchrashuvda tomonlar mamlakatlar o‘rtasida transport sohasidagi o‘zaro manfaatli hamkorlikni rivojlantirish masalalarini muhokama etgan. Xususan, O‘zbekiston va Mo‘g‘uliston hukumatlari o‘rtasida Havo qatnovi to‘g‘risida hamda xalqaro avtomobil tashuvlari to‘g‘risida bitimni tuzish bilan bog‘liq masalalar ko‘rib chiqilgan.
Tomonlar xalqaro avtomobil tashuvlari sohasidagi hamkorlikni rivojlantirish, milliy tashuvchilarga qulay shart-sharoitlarni yaratish, yangi transport koridorlarini ochish, joriy bozorlari sharoitlarini o‘rganish maqsadida hukumatlararo tegishli bitim imzolangunga qadar ruxsatnoma blankalarini ayriboshlashga kelishib olgan. Uchrashuv yakunida O‘zbekiston transport vazirligi va Mo‘g‘uliston yo‘llar va transportni rivojlantirish vazirligi o‘rtasida o‘zaro anglashuv to‘g‘risidagi protokol imzolangan.
Avvalroq Mo‘g‘uliston O‘zbekiston fuqarolari uchun 30 kunlik muddatga vizasiz tartibni joriy qilgani haqida xabar berilgandi.
Izoh (0)