Toshkent shahar hokimi Jahongir Ortiqxo‘jayevning 30-maydagi qarori bilan “Toshkent-2” xalqaro terminali va ichki qatnovlar uchun mo‘ljallangan “Toshkent-3” terminalining avtoturargohlari, shuningdek, poytaxt aeroporti hududiga tutash joylardagi avtoturargohlar Uzbekistan Airports balansiga o‘tkaziladi. Bu haqda aeroport matbuot xizmati xabar berdi.
Mazkur hududlarni kompaniya ixtiyoriga o‘tkazish prezidentning 2021-yil 30-apreldagi “Fuqarolik aviatsiyasi korxonalarini transformatsiya qilish va qo‘llab-quvvatlash chora-tadbirlari to‘g‘risida”gi qarorida ko‘zda tutilgan edi.
“Ushbu hududlarning o‘tkazilishi avtoturargohlarni avtomatlashtirish, aerovokzal oldidagi hududlarni qaytadan qulay loyihalashtirish, yo‘lovchilarni kutib oluvchilar va kuzatuvchilar uchun ko‘proq qulayliklar yaratish hamda o‘z yechimini kutayotgan taksi xizmati bilan bog‘liq muammolarni hal qilish imkonini beradi. Avtoturargohlarda to‘xtash joyi uchun to‘lovni inson omilisiz amalga oshirish imkonini beruvchi avtomatlashtirilgan tizimni joriy etish rejalashtirilmoqda. Shuningdek, kompaniya avtoturargohlarning joylashuvi va ulardan foydalanish davomiyligini (soat, sutka) hisobga olgan holda moslashuvchan tarif tizimini ishlab chiqmoqda”, — dedi Uzbekistan Airports boshqaruvi raisi Ra’no Jo‘rayeva.
Ta’kidlanishicha, keyinchalik Davlat aktivlarini boshqarish agentligi tomonidan avtoturargohlarni baholash va aksiyadorlik jamiyatining davlat ulushini oshirish bo‘yicha tegishli buyruq qabul qilinadi. Shundan so‘ng tegishli tartibda yagona aksiyador — Moliya vazirligi tomonidan davlat kompaniyaning ulushini oshirish va avtoturargohlar qiymatini ustav kapitaliga kiritish to‘g‘risida qaror qabul qilinadi. Barcha amalga oshirilgan ishlar yakuni bo‘yicha kadastr hujjatlarini Kadastr agentligi tomonidan “Munitsipal mulklarni boshqarish markazi” DUKdan Uzbekistan Airports AJ nomiga qayta rasmiylashtirish amalga oshiriladi.
Eslatib o‘tamiz, 2021-yilning dekabrida Uzbekistan Airports rahbari Toshkent aeroporti oldida turli narxlardagi avtoturargohni tashkil etish rejalashtirilganini ma’lum qilgandi. “Bu boradagi ishlarni iyulda boshlaganmiz, turargohlarni qayta jihozlash va zaruriy IT-tizimlarni o‘rnatishni rejalashtirgandik. Afsuski, ushbu yer maydonlari bizga topshirilmagani sabab muammolar yuzaga keldi. Hozirda u hokimlikka tegishli” — deygan edi Ra’no Jo‘rayeva.
Izoh (0)