Buxoroda Turkiy davlatlar tashkilotiga a’zo mamlakatlar yoshlari ishtirokida IV “Yosh liderlar” forumi bo‘lib o‘tdi. Forumda Buxoro shahri birinchi turkiy dunyo yoshlari poytaxti, deb e’lon qilindi, deya xabar bermoqda “Daryo” muxbiri.
O‘zbekiston Yoshlar ishlari agentligi direktori Alisher Sa’dullayevning so‘zlariga ko‘ra, mazkur forum maqsadi turkiy davlatlar tashkilotining real salohiyatini ro‘yobga chiqarish, ahamiyatini oshirish va xalqaro hamjamiyatdagi rolini kuchaytirishga qaratilgan bo‘lib, unga 10 mingdan ortiq yoshlar jalb etilgan.
“O‘tgan yili Istanbul sammitida O‘zbekiston prezidenti tomonidan 2022-yilni Turkiy dunyoda Yoshlar tashabbuslarini qo‘llab-quvvatlash yili deb e’lon qilish tashabbusi ilgari surilgan edi. Bu tashabbus barcha qardoshlar tomonidan qo‘llab-quvvatlandi. Shu asosda o‘tkazilayotgan mazkur forum bir necha ming yillik qardosh xalqlar yoshlarining o‘zaro aloqalarini yanada rivojlantirishda juda muhim bo‘lib, tarixiy ahamiyat kasb etadi”, — dedi Alisher Sa’dullayev.
Ta’kidlanishicha, forumda ishtirok etish uchun Turkiya, Ozarbayjon, Qozog‘iston, Qirg‘iziston, Turkmaniston va Vengriya davlatidan yoshlar hamda delegatsiya a’zolari kelgan.
Forumda “Baykar Makina” kompaniyasi texnik direktori Selchuk Bayrakdar, Turkiya Respublikasi Yoshlar va sport vaziri Mehmet Muharrem Kasapo‘g‘lu, Qirg‘iziston Respublikasi madaniyat, axborot, sport va yoshlar siyosati vaziri o‘rinbosari Sovuzbek Nadirbekov, Milliy yoshlar tashkiloti kengashi raisi Azer Aliyev, Qozog‘iston Respublikasi Fuqaroviy tashabbuslarni qo‘llab-quvvatlash markazi raisi o‘rinbosari Jasulan Bisembiyev, Vengriya rektorlar maslahat kengashi a’zosi Nagi Denes Andras so‘zga chiqib, forum bilan bog‘liq o‘z fikr-mulohazalarini bildirishgan. Shuningdek, Turkiy davlatlar tashkiloti bosh kotibi Bagdad Amreyev so‘zga chiqib, forum turkiy dunyoning buyuk madaniy-tarixiy merosini ommalashtirish maqsadida madaniy-gumanitar hamkorlikni kuchaytirishga xizmat qilishini ta’kidlagan.
Forumda Buxoro shahri “Birinchi turkiy dunyo yoshlar tashabbuslari poytaxti” deb e’lon qilingan. Shundan so‘ng turkiy davlatlar tashkilotining “Yosh liderlar” forumi rezolyutsiyasi imzolanib, bu haqdagi sertifikat Buxoro hokimi Botir Zaripovga topshirilgan.
Yaqinda bo‘lib o‘tgan “Zargarlik, zardo‘zlik hamda kashtado‘zlik san’ati” festivalida Buxoro shahriga Jahon hunarmandlar shahri maqomi berilgan edi.
Izoh (0)