Qirg‘iziston sog‘liqni saqlash vaziri Alimkadir Beyshenaliyev qo‘lga olindi, deb yozadi Tengrinews. Ma’lumotni respublika bosh prokuraturasi matbuot xizmati tasdiqladi.
Mansabdor vaksinalarni asossiz sotib olganlikda gumonlanmoqda.
“2020-yil dekabridan 2021-yil sentabrigacha Qirg‘iziston xalqaro tashkilotlar, Rossiya, Xitoy, Ozarbayjon va Qozog‘istondan beg‘araz gumanitar yordam sifatida 451 560 doza vaksina qabul qilgan. Shuningdek, davlat rahbarining Rossiya va Xitoy prezidentlari bilan kelishuvlari natijasida gumanitar yordam ko‘rinishida 6 million dozadan ortiq vaksina olingan. Shunga qaramay, sog‘liqni saqlash vaziri topshirig‘i bilan vazirlik chet el kompaniyasidan 1 milliard 581 ming som (taxminan 12,5 million dollar) qiymatdagi 2 million 460 ming doza vaksina sotib olgan”, — deyiladi bosh prokuratura xabarida.
Qayd etilishicha, barcha mablag‘lar ofshor hisoblarga o‘tkazilgan.
Sotib olingan vaksinalarning 243 mingdan ortiq dozalari qo‘llanilmagan, ularning yaroqlilik muddati tugab bormoqda.
Muassasa ma’lumotlariga ko‘ra, davlatga yetkazilgan zarar 1 milliard 581 ming som (12,5 million dollar)ga baholanmoqda.
“Ushbu holat bo‘yicha Jinoyat kodeksining 336-moddasi (“Korrupsiya”)ga muvofiq jinoyat ishi qo‘zg‘atildi. Bundan tashqari, sog‘liqni saqlash vaziri va idoraning boshqa xodimlari ishtirokidagi yana 5 ta korrupsiya ishi o‘rganilmoqda”, — deya ma’lum qildi Qirg‘iziston bosh prokuraturasi.
Eslatib o‘tamiz, avvalroq Qirg‘iziston sobiq prezidenti Almazbek Atambayevga 2010-yil iyunidagi to‘qnashuvlar bo‘yicha yangi ayblovlar qo‘yilgandi. Bundan tashqari, uning Qo‘y-Tosh qishlog‘ida joylashgan qarorgohi musodara qilingan.
Izoh (0)