Litva hukumati Turkiya bilan Ukraina armiyasi ehtiyojlari uchun Bayraktar dronlarini sotib olish bo‘yicha shartnoma imzoladi. Bu haqda Litva milliy mudofaa vaziri Arvidas Anushauskas Twitter’da ma’lum qildi.
“Turkiyada mamlakat mudofaa agentligi prezidenti Ismoil Demir Litva Milliy mudofaa vazirligi bilan hamkorlik to‘g‘risidagi bitimni imzoladi. Bu kelishuv Bayraktarni sotib olishga yo‘l ochadi”, — deb yozgan Anushauskas Twitter sahifasida.
Vazirning yozishicha, Litvada fuqarolar Ukraina armiyasining ehtiyojlari uchun hujumchi dronlarni sotib olish maqsadida uch kun ichida qariyb 6 million yevro yig‘ishgan.
May oyi oxirida litvalik jurnalist Andryus Tapinas jonli efirda Ukraina armiyasiga Bayraktar dronlarini sotib olish uchun 5 million yevro yig‘ish tashabbusi bilan chiqqan edi. #bayraktarasUkraina heshtegi ostida mablag‘ yig‘ish kampaniyasi uch hafta davom etishi kerak bo‘lgan, ammo bu kutilganidan tezroq yakunlandi.
Shuningdek, Litva Ukrainaga harbiy yordamning yangi partiyasini tayyorlayotgani xabar qilingan. Uning tarkibiga M113 zirhli transportyorlari, minalardan tozalash ishlari uchun yuk mashinalari va yo‘ltanlamas avtomobillar kiradi.
Eslatib o‘tamiz, Litva parlamenti Ukrainadagi voqealar sabab Rossiyani “terrorchi davlat” deb e’lon qilgan. Litva rasmiylari ittifoqqa a’zo davlatlar ichida birinchi bo‘lib Rossiya gazidan butunlay voz kechdi, rossiyaliklarga qisqa muddatli vizalar berishni to‘xtatdi, Rossiya bilan diplomatik vakolatxona darajasini pasaytirdi va Rossiya elchisini mamlakatdan chiqarib yubordi.
Mavzuga doir:
- Kanada Ukrainaga yana 20 mingta artilleriya snaryadlarini yuboradi
- Pentagon rahbari 20 ta davlat Kiyevga qo‘shimcha harbiy yordam yuborishini ma’lum qildi
- Bayden Ukrainaga baravar o‘t ochish reaktiv tizimlari yetkazilishini e’lon qildi. Kiyev ulardan Rossiya hududiga hujum qilishda foydalanmaslikka va’da berdi
- Germaniya kansleri Ukrainaga “juda og‘ir qurol-yarog‘” yetkazib berish qarorini ma’lum qildi
Izoh (0)