Қирғизистон соғлиқни сақлаш вазири Алимкадир Бейшеналиев қўлга олинди, деб ёзади Tengrinews. Маълумотни республика бош прокуратураси матбуот хизмати тасдиқлади.
Мансабдор вакциналарни асоссиз сотиб олганликда гумонланмоқда.
«2020 йил декабридан 2021 йил сентябригача Қирғизистон халқаро ташкилотлар, Россия, Хитой, Озарбайжон ва Қозоғистондан беғараз гуманитар ёрдам сифатида 451 560 доза вакцина қабул қилган. Шунингдек, давлат раҳбарининг Россия ва Хитой президентлари билан келишувлари натижасида гуманитар ёрдам кўринишида 6 миллион дозадан ортиқ вакцина олинган. Шунга қарамай, соғлиқни сақлаш вазири топшириғи билан вазирлик чет эл компаниясидан 1 миллиард 581 минг сом (тахминан 12,5 миллион доллар) қийматдаги 2 миллион 460 минг доза вакцина сотиб олган», — дейилади бош прокуратура хабарида.
Қайд этилишича, барча маблағлар офшор ҳисобларга ўтказилган.
Сотиб олинган вакциналарнинг 243 мингдан ортиқ дозалари қўлланилмаган, уларнинг яроқлилик муддати тугаб бормоқда.
Муассаса маълумотларига кўра, давлатга етказилган зарар 1 миллиард 581 минг сом (12,5 миллион доллар)га баҳоланмоқда.
«Ушбу ҳолат бўйича Жиноят кодексининг 336-моддаси («Коррупция»)га мувофиқ жиноят иши қўзғатилди. Бундан ташқари, соғлиқни сақлаш вазири ва идоранинг бошқа ходимлари иштирокидаги яна 5 та коррупция иши ўрганилмоқда», — дея маълум қилди Қирғизистон бош прокуратураси.
Эслатиб ўтамиз, аввалроқ Қирғизистон собиқ президенти Алмазбек Атамбаевга 2010 йил июнидаги тўқнашувлар бўйича янги айбловлар қўйилганди. Бундан ташқари, унинг Қўй-Тош қишлоғида жойлашган қароргоҳи мусодара қилинган.
Изоҳ (0)