Angela Merkel Rossiyaning “yovvoyi urushi”ni qoraladi va Ukraina bilan birdamligini ma’lum qildi

Germaniya sobiq kansleri Angela Merkel Ukraina bilan birdamligini va ukrainlarning Rossiya bilan urushda o‘z mamlakatini himoya qilish huquqini qo‘llab-quvvatlashini ma’lum qildi, deb yozadi Meduza.

U bu haqda qariyb olti oy ichidagi birinchi ommaviy nutqida aytib o‘tdi. Bungacha Merkelning bayonotlari uning ofisi vakillari tomonidan tarqatilar edi.

Merkel Germaniya Kasaba uyushmalari assotsiatsiyasi rahbari Rayner Xoffmanning iste’foga chiqishiga bag‘ishlangan tadbirda chiqish qildi. U Ukrainada yuz berayotgan voqealarni “varvarlar urushi” deb atab, uni iloji boricha tezroq tugatish kerakligini aytdi.

Sobiq kansler so‘zlariga ko‘ra, Rossiya bosqini oqibatlari qanchalik davomli bo‘lishini hozircha hech kim aniq baholay olmaydi. Biroq ular, Merkelning fikricha, sezilarli darajada bo‘ladi, ayniqsa, ukrainaliklar uchun. Uning ta’kidlashicha, urush chog‘ida tinch aholi jabrlangan. “Bunday dahshatga misol qilib Buchani aytish mumkin”, — dedi u.

Hozirgi vaziyatda, dedi Merkel, Yevroittifoq birdamligi katta ahamiyatga ega. “Biz hech qachon tinchlik va erkinlikni o‘z-o‘zidan yuz beradigan narsa sifatida qabul qilmasligimiz kerak”, — deya qo‘shib qo‘ydi sobiq kansler. Shuningdek, u Germaniya hukumati, Yevroittifoq hamda boshqa mamlakat va xalqaro tashkilotlarning jangovar harakatlarni to‘xtatishga qaratilgan sa’y-harakatlarini qo‘llab-quvvatladi.

Ukrainada urush boshlanganidan buyon Angela Merkel Rossiyaning Ukrainaga bostirib kirishi yuzasidan deyarli o‘z fikr-mulohazalarini bildirmagan edi. 25-fevral kuni u urushni “Yevropa tarixida sovuq urush davri tugaganidan keyingi keskin burilish yasagan voqea” deb atadi.

Sobiq kanslerning hozirgi bayonoti Merkel hukumatining Rossiyaga nisbatan siyosatiga qarshi tanqidlar fonida yangradi. Bunday tanqidlar nafaqat Germaniyaning o‘zida, balki Ukraina, AQSH va boshqa boshqa mamlakatlar tomonidan ham aytildi.