Lukashenkoni haqorat qilishda ayblangan belaruslik psixolog Rossiyada hibsga olindi

Sankt-Peterburgda belaruslik psixolog Andrey Russkix hibsga olindi, u Belarus prezidenti Aleksandr Lukashenkoni haqorat qilishda ayblanmoqda, dedi Russkixning advokati Mariya Belyayeva “RBK”ga.

“Bu ishda ikkita modda bor — prezidentni haqorat qilish hamda ijtimoiy va boshqa turdagi nafratni qo‘zg‘atish to‘g‘risidagi moddalar. Bu ijtimoiy tarmoqlardagi izohlar bilan bog‘liq. Biz albatta shikoyat qilamiz. U 6-iyulga qadar Kolpino shahridagi “Kresti” tergov izolyatorida bo‘ladi, ammo keyin unga nisbatan ehtiyot chorasi uzaytirilishi mumkin ”, — dedi u.

Advokatning aniqlik kiritishicha, psixolog 28-may kuni Sankt-Peterburgdagi temiryo‘l vokzalida qo‘lga olingunga qadar qidiruvda ekanini bilmagan.

Psixolog Belarus Jinoyat kodeksining 368-moddasi, 1-qismi (Belarus prezidentini ommaviy haqorat qilish) va 130-moddasi (irqiy, milliy yoki boshqa turdagi nafratni qo‘zg‘atish) bo‘yicha ayblanmoqda. Birinchi modda maksimal to‘rt yilgacha, ikkinchisi esa besh yilgacha ozodlikdan mahrum qilish jazosini nazarda tutadi.

May oyi boshida Belarus sudi rossiyalik Sofya Sapegani olti yillik koloniyaga hukm qilgan edi. U ijtimoiy nafratni qo‘zg‘atish va shaxsiy ma’lumotlarni noqonuniy yig‘ishda aybdor deb topilgan.

Sofya Sapega — Nexta nashrining sobiq bosh muharriri Roman Protasevichning sevgilisi. 2021-yilning may oyida ular o‘tirgan Afina—Vilnyus yo‘nalishidagi Ryanair samolyoti majburan Minskka qo‘ndirilgan edi, o‘shanda juftlik hibsga olingan.

Roman Protasevich hibsga olinganidan so‘ng jinoiy ishi bo‘yicha tergov bilan hamkorlik qila boshladi, shuningdek, u Belarus va Rossiyadagi hukumatparast ommaviy axborot vositalariga bir nechta intervyular berdi. Hozir u uy qamog‘ida, internetdan foydalanishga ruxsat berilgan. Protasevichga qarshi sud hali boshlanmagan.