Bloomberg: Yevroittifoq Rossiyaga qarshi yangi sanksiyalarni ma’qulladi. Ular neftga qisman embargo va Kabayevaga qarshi sanksiyalarni o‘z ichiga oladi

Yevroittifoq Rossiyaga qarshi sanksiyalarning oltinchi paketini ma’qulladi. Bu haqda Bloomberg manbalariga tayanib xabar bermoqda, deb yozadi Meduza. Ular Yevroittifoq rasmiy jurnalida e’lon qilinganidan keyin kuchga kiradi.

Yangi paket Yevropa dengiz orqali olib kelinadigan Rossiya neftidan voz kechishini ko‘zda tutadi. Yevroittifoq mamlakatlari uni yarim yil davomida, neft mahsulotlarini esa sakkiz oy davomida sotib olmasligi kerak bo‘ladi.

Bundan tashqari, yarim yildan keyin Rossiya neftini boshqa mamlakatlarga yetkazib berishni sug‘urtalashga taqiq kuchga kiradi, Yevropa hukumatlari rejasiga ko‘ra, bu ham Rossiya neft eksportini zaiflashtirishi kerak.

Shuningdek, yangi sanksiyalar “Sberbank”, Moskva kredit banki va “Rosselxozbank”ni SWIFT xalqaro to‘lov tizimidan uzishni o‘z ichiga oladi. Avvalroq VTB va “Otkritiye” kabi bir nechta yirik banklar bu tizimdan uzilgan edi.

Bloomberg ma’lumotlariga ko‘ra, yangi paket doirasida sobiq gimnastikachi Alina Kabayevaga qarshi sanksiyalar kiritildi, uning Rossiya prezidenti Vladimir Putin bilan “yaqin aloqasi” bor deb hisoblashadi. Shu bilan birga, Vengriyaning talabi bilan sanksiya ro‘yxatidan patriarx Kirill istisno qilindi.

Yevroittifoq Rossiyaga qarshi sanksiyalarning oltinchi paketini ko‘p haftalardan buyon kelisha olmayotgan edi. Asosiy to‘siq Rossiyadan quvur orqali neft qabul qilayotgan Vengriyaning to‘liq neft embargosi kiritilishiga qarshiligi bo‘layotgan edi.