Moldova parlamenti “Axborot xavfsizligi to‘g‘risida”gi qonunni qabul qildi, u mamlakatda Rossiyada tayyorlangan, siyosiy va harbiy mavzudagi yangiliklar va dasturlar translyatsiya qilinishini taqiqlaydi, deb yozadi Meduza.
Qonun bunday dasturlar Yevroittifoq, AQSH, Kanada yoki Yevropa transchegaraviy televideniye haqidagi konvensiyasini ratifikatsiya qilgan mamlakatlarda tayyorlangan bo‘lsa, ularni qayta translyatsiya qilishga ruxsat beradi. Rossiya ushbu konvensiyani 2006-yilda imzolagan, ammo ratifikatsiya qilmagan.
Rossiyaning “harbiy” mazmunga ega bo‘lmagan filmlari va ko‘ngilochar dasturlari Moldova televideniyesida ko‘rsatilishi mumkin.
“Interfaks” yozishicha, bunday taqiq qonunchilik darajasida 2017-yilda ham kiritilgan, ammo 2020-yilda bekor qilingan edi. Rossiya Ukrainaga bostirib kirgach, u favqulodda holat rejimi doirasida yana kiritildi.
Rossiya Ukrainaga bostirib kirganidan keyin Moldova hukumati Yevroittifoq a’zoligiga nomzod maqomini olish uchun ariza berdi (Ukraina va Gruziya hukumatlari ham shunday ish tutdi). Bundan tashqari, Moldova parlamenti Georgiy tasmasini hamda urushni qo‘llab-quvvatlashni eslatadigan Z va V belgilarini ham taqiqladi.
May oyida rossiyaparast siyosatchi hisoblanadigan Moldova sobiq prezidenti Igor Dodon davlatga xiyonatda va korrupsiyada ayblanib, uy qamog‘iga yuborildi.
Izoh (0)