Avstriyada 2021-yilda irqchilik va islomofobiya asosida musulmonlarga qarshi 1061 ta hujum qayd etilgan. Bu haqda Avstriyaning Musulmonlar uchun hujjatlar va maslahat markazi (Dokustelle Osterreich) tomonidan chop etilgan “Antimusulmon irqchilik bo‘yicha 2021-yilgi hisobot”iga tayanib, Anadolu xabar berdi.
Hujjatga ko‘ra, hujumlarning aksariyati raqamli platformalarda sodir bo‘lgan, chunki COVID-19 pandemiyasi tufayli onlayn ijtimoiy muloqot ko‘proq bo‘lgan.
Hisobotda musulmonlarga qarshi og‘zaki va jismoniy hujumlarga duchor bo‘lganlarning 69 foizini ayollar, 26 foizini esa erkaklar tashkil etgani qayd etilgan. Ko‘p hollarda hijobli ayollar og‘zaki haqoratlarga, ayrim hollarda esa jismoniy zo‘ravonlikka uchragan.
Musulmonlarga qarshi hujumlarning 65,4 foizi onlayn platformalarda sodir etilgan bo‘lsa, ularning 34,6 foizi ijtimoiy hayotning turli sohalarida sodir bo‘lgan.
Hisobotda, shuningdek, antimusulmon irqchilik harakatlarining 77 foizi erkaklar, 22 foizi ayollar tomonidan sodir etilgani aytiladi.
Nafrat so‘zlari va musulmonlarga qarshi tajovuzga da’vat qilish umumiy hodisalarning 78,5 foizini tashkil qilgan. Haqoratlar antimusulmon irqchilik holatlarining 9,1 foizini tashkil qilgan bo‘lsa, musulmonlarga tegishli mulkka yetkazilgan jismoniy zarar 2,4 foizni tashkil etgan.
Voqealarning 4 foizga yaqinini ijtimoiy hayotning turli sohalarida musulmonlarga nisbatan kamsitish va irqchilik xatti-harakatlari tashkil etadi.
Irqchilikning boshqa ko‘rinishlari, jumladan politsiya zo‘ravonligi, tahdidlar, psixologik zo‘ravonlik va jismoniy ta’qiblar ham umumiy holatlarning 6,2 foizini tashkil qiladi.
Izoh (0)