Молдова парламенти «Ахборот хавфсизлиги тўғрисида»ги қонунни қабул қилди, у мамлакатда Россияда тайёрланган, сиёсий ва ҳарбий мавзудаги янгиликлар ва дастурлар трансляция қилинишини тақиқлайди, деб ёзади Meduza.
Қонун бундай дастурлар Евроиттифоқ, АҚШ, Канада ёки Европа трансчегаравий телевидение ҳақидаги конвенциясини ратификация қилган мамлакатларда тайёрланган бўлса, уларни қайта трансляция қилишга рухсат беради. Россия ушбу конвенцияни 2006 йилда имзолаган, аммо ратификация қилмаган.
Россиянинг «ҳарбий» мазмунга эга бўлмаган фильмлари ва кўнгилочар дастурлари Молдова телевидениесида кўрсатилиши мумкин.
«Интерфакс» ёзишича, бундай тақиқ қонунчилик даражасида 2017 йилда ҳам киритилган, аммо 2020 йилда бекор қилинган эди. Россия Украинага бостириб киргач, у фавқулодда ҳолат режими доирасида яна киритилди.
Россия Украинага бостириб кирганидан кейин Молдова ҳукумати Евроиттифоқ аъзолигига номзод мақомини олиш учун ариза берди (Украина ва Грузия ҳукуматлари ҳам шундай иш тутди). Бундан ташқари, Молдова парламенти Георгий тасмасини ҳамда урушни қўллаб-қувватлашни эслатадиган Z ва V белгиларини ҳам тақиқлади.
Май ойида россияпараст сиёсатчи ҳисобланадиган Молдова собиқ президенти Игорь Додон давлатга хиёнатда ва коррупцияда айбланиб, уй қамоғига юборилди.
Изоҳ (0)