JSST: Shimoliy Koreyada koronavirus bilan bog‘liq vaziyat yomonlashmoqda

Jahon sog‘liqni saqlash tashkiloti (JSST) fikricha, Shimoliy Koreyada COVID-19 bilan bog‘liq vaziyat, aftidan, “yaxshilanmayapti, balki yomonlashyapti”. Bu haqda JSSTning favqulodda vaziyatlar bo‘yicha dasturi direktori Maykl Rayan aytib o‘tdi, deb yozadi “Kommersant”.

Rayan KXDRni mamlakatda COVID-19 avj olishi bilan bog‘liq vaziyat yuzasidan ko‘proq ma’lumot berishga chaqirdi va “ishlov berilmagan ma’lumotlardan foydalanish va joylardagi haqiqiy vaziyatdan xabardor bo‘lish bo‘yicha katta muammolar” borligi, shu tufayli vaziyatni tahlil qilish qiyin bo‘layotganini ta’kidladi. Uning so‘zlariga ko‘ra, hozir tashkilotda KXDRdagi vaziyat bo‘yicha hukumat tomonidan rasman e’lon qilinayotgan ma’lumotlardan boshqa hech qanday axborot yo‘q. Shuningdek, Rayan qayd etishicha, JSST Shimoliy Koreya hukumatiga pandemiyaga qarshi kurashda bir necha marta yordam taklif qilgan.

KXDR hukumati esa mamlakatdagi vaziyat yaxshilanayotganini da’vo qilmoqda, may oxirida Pxenyanda deyarli barcha COVID-cheklovlar bekor qilindi.

KXDR hukumati COVID-19 avj olgani haqida 12-may kuni e’lon qildi. O‘sha kungacha pandemiya boshidan buyon mamlakatda rasman kasallanganlar bo‘lmagan.

Shimoliy Koreya mamlakatda koronavirus tarqalishiga yo‘l qo‘ymaslik maqsadida 2020-yil bahoridan o‘z chegaralarini yopib qo‘ygandi. Xitoy bilan tovar aylanmasi ahamiyatli tarzda kamaygan, shu bilan birga barcha yuklar majburiy tartibda karantinga jo‘natilardi.

KXDR vaksinatsiya darajasi deyarli nolga teng. Mamlakat hukumati COVAX dasturi doirasida xalqaro ko‘makdan va bepul vaksinalardan voz kechgan, chunki davlatga kirib keladigan xorijlik mutaxassislar infeksiya olib kirishidan xavfsiragan.

KXDRga qo‘shni Xitoyda ikki yil davomida kasallanish holatlari deyarli kuzatilmagan bo‘lsa, 2022-yil bahorida u yerda ham katta ko‘lamda avj ola boshladi.