KXDRda epidemiya fonida dorixonalarga dori-darmonlar yetkazib berishga armiya jalb qilinadi

KXDR hukumati bezgak (isitma) tarqalishi fonida dorixonalarga dori-darmonlar yetkazib berishni yo‘lga qo‘yish uchun harbiylarni safarbar etadi. Tegishli farmon mamlakat rahbari Kim Chen In tomonidan Koreya Mehnat partiyasi siyosiy byurosining shoshilinch majlisida berilgan, deb yozadi “RBK” Koreya Markaziy telegraf agentligiga tayanib.

Shimoliy Koreya hukumati mamlakatda mavjud dori zaxiralarini taqsimlashni topshirgan, biroq yig‘ilishda yetakchi ular, shu jumladan, dorixonalar orqali odamlarga o‘z vaqtida yetib bormayotganini ta’kidlagan.

Mamlakat rahbari armiyani safarbar etib, “zudlik bilan” Pxenyanga dorilar yetkazib berishni yo‘lga qo‘yishni buyurdi.

Kim Chen In vazirlarni va milliy sog‘liqni saqlash sohasini ishga mas‘uliyatsiz yondashgani uchun tanqid qildi va ularning tashkilotchilik qobiliyatlarini salbiy baholadi. U dorixona punktlari tegishlicha ta’minlanmaganiga e’tibor qaratdi. Xususan, KXDR rahbariga dorixonalarda dori-darmonlarni saqlash uchun vitrinalardan boshqa joy va xonalar yo‘qligi tufayli ular o‘z funksiyasini uzluksiz bajara olmasligi, sotuvchilarning esa himoya kiyimlari yo‘qligi ma’qul kelmagan.

Ayni vaqtda Janubiy Koreya KXDRga koronavirus avj olishiga qarshi kurashishda istalgan zaruriy yordamni berishga tayyorligini bildirdi. “Agar Shimoliy Koreya rozi bo‘lsa, biz hech qanday zaruriy yordamni ayamaymiz, xoh bu dori-darmonlar, shu jumladan, COVID-19 ga qarshi vaksinalar, tibbiy uskunalar vax oh tibbiy xodimlar bo‘lsin”, — dedi respublika prezidenti Yun Sok Yol Milliy assambleya qarshisida nutq so‘zlayotib.

KXDRda o‘tgan bir kecha-kunduzda isitma simptomlariga ega 402,9 ming kishi aniqlangan. Aprel oxiridan 15-mayga qadar kasallanganlarning umumiy soni 1,2 million nafarni tashkil qilgan. Bir sutkada 152 ming kishi sog‘aygan, sakkiz kishi vafot etgan. O‘lim holatlarining jami soni 50 taga yetgan.

Koreya Markaziy telegraf agentligi ma’lumotlariga ko‘ra, “noma’lum bezgak” mamlakatda aprel oxirida tarqala boshlagan. Shimoliy Koreya yetakchisi Kim Chen In uni KXDR tarixidagi “buyuk iztirob” deb atadi.

KXDR hukumati COVID-19 avj olgani haqida 12-may kuni e’lon qildi. O‘sha kungacha pandemiya boshidan buyon mamlakatda rasman kasallanganlar bo‘lmagan.

Shimoliy Koreya mamlakatda koronavirus tarqalishiga yo‘l qo‘ymaslik maqsadida 2020-yil bahoridan o‘z chegaralarini yopib qo‘ygandi. Xitoy bilan tovar aylanmasi ahamiyatli tarzda kamaygan, shu bilan birga barcha yuklar majburiy tartibda karantinga jo‘natilardi.

KXDR vaksinatsiya darajasi deyarli nolga teng. Mamlakat hukumati Covax dasturi doirasida xalqaro ko‘makdan va bepul vaksinalardan voz kechgan, chunki davlatga kirib keladigan xorijlik mutaxassislar infeksiya olib kirishidan xavfsiragan.

KXDRga qo‘shni Xitoyda ikki yil davomida kasallanish holatlari deyarli kuzatilmagan bo‘lsa, 2022-yil bahorida u yerda ham katta ko‘lamda avj ola boshladi.