KXDR yetakchisi Kim Chen In mamlakatda koronavirus avj olishini “buyuk iztirob” deb atadi. Bu haqda Yonhap xabar bermoqda.
Foto: “TASS”
Siyosiy byuro a’zolari qarshisida nutq so‘zlar ekan, Kim Chen In koronavirus — KXDRning butun tarixi davomida uning oldida turgan eng katta sinov ekanini ta’kidladi. U kasallikka qarshi kurashda “ilg‘or mamlakatlar”, birinchi navbatda, Xitoy tajribasini o‘rganib chiqishga chaqirdi.
Rasmiy ma’lumotlarga qaraganda, 13-may kunining o‘zidayoq 26 million aholiga ega mamlakatda 174 ming kishi kasallikka chalingan. Aprel oxiridan buyon Shimoliy Koreyada jami qariyb 524 ming kishi kasallangan.
KXDR hukumati COVID-19 avj olgani haqida 12-may kuni e’lon qildi. O‘sha kungacha pandemiya boshidan buyon mamlakatda rasman kasallanganlar bo‘lmagan.
Shimoliy Koreya mamlakatda koronavirus tarqalishiga yo‘l qo‘ymaslik maqsadida 2020-yil bahoridan o‘z chegaralarini yopib qo‘ygandi. Xitoy bilan tovar aylanmasi ahamiyatli tarzda kamaygan, shu bilan birga barcha yuklar majburiy tartibda karantinga jo‘natilardi.
KXDR vaksinatsiya darajasi deyarli nolga teng. Mamlakat hukumati Covax dasturi doirasida xalqaro ko‘makdan va bepul vaksinalardan voz kechgan, chunki davlatga kirib keladigan xorijlik mutaxassislar infeksiya olib kirishidan xavfsiragan.
KXDRga qo‘shni Xitoyda ikki yil davomida kasallanish holatlari deyarli kuzatilmagan bo‘lsa, 2022-yil bahorida u yerda ham katta ko‘lamda avj ola boshladi.
