1-iyun kuni Turkmaniston prezidenti Serdar Berdimuhamedov Umra ziyoratini amalga oshirish uchun Saudiya Arabistoniga ikki kunlik tashrif bilan bordi, deb xabar beradi “Xronika Turkmenistana”.
Bu Serdar Berdimuhamedovning Turkmaniston prezidenti lavozimiga kirishganidan buyon birinchi xorijiy tashrifidir. Uni otasi — Milliy kengashning Xalq maslahati raisi Gurbanguli Berdimuhamedov, Majlis raisi, bosh vazir o‘rinbosarlari va mamlakat muftiysi kuzatib qoldi.
Qayd etilishicha, Saudiya Arabistoniga prezident bilan birga turkmanistonlik keksalar ham jo‘nab ketgan. Jidda aeroportida davlat rahbarini Makka viloyati gubernatori va Saudiya Arabistoni qiroli maslahatchisi Xalid ibn Faysal al-Saud kutib olgan. Saudiyaning SPA agentligi e’lon qilgan fotosuratlarga qaraganda, Serdar Berdimuhamedovga safarda o‘g‘li Kerimguli hamrohlik qilgan.
Turkmaniston prezidenti va delegatsiya a’zolari masjidga tashrif buyurib, namoz o‘qigan, so‘ng ziyorat uchun zarur bo‘lgan rasm-rusumlarni bajargan.
Nashr eslatishicha, prezidentning otasi — Gurbanguli Berdimuhamedov 2016-yil mayida Umra ziyoratini amalga oshirgan edi (shundan keyin davlat OAVlari uning nomiga “hoji” so‘zini qo‘shib yozadigan bo‘ldi).
Izoh (0)