Ukrainaga yuborilayotgan qurollar jinoyatchilarning qo‘liga tushishi mumkin — Interpol

Ukrainaga yetkazib berilayotgan qurollarning katta qismi keyinchalik jinoyatchilar qo‘liga tushishi mumkin, dedi Xalqaro jinoiy politsiya tashkiloti (Interpol) rahbari Yurgen Shtok. Uning so‘zlariga ko‘ra, Ukrainadagi harbiy mojaro allaqachon yirik hajmdagi o‘g‘it va yonilg‘i o‘g‘irlanishiga sabab bo‘lgan.

“Mojaro paytida qurollarning nihoyatda ko‘pligi mojaro tugaganidan keyin ushbu qurollarning noqonuniy aylanishiga olib keladi”, — dedi Shtok Parijda bo‘lib o‘tgan brifingda. Uning so‘zlariga ko‘ra, jinoiy to‘dalar qurollarni, jumladan, og‘ir qurollarni qanday qilib qo‘lga kiritish haqida o‘ylashni boshlagan. Bundan tashqari, u jinoiy guruhlar ushbu qurollarni butun qit’a bo‘ylab almashishidan xavotir bildirdi.

Shtok Ukrainaga qurol yetkazib beruvchi davlatlarni jahon jinoiy bozorlarida qurol sotilishi haqidagi ma’lumotlarga ega Interpol ma’lumotlar bazasidan foydalanishga chaqirdi. 23-may kuni Pentagon rahbari Lloyd Ostin 20 ta davlat Ukrainaga yangi harbiy yordam paketlari jo‘natmoqchiligini ma’lum qilgandi.

Xuddi shunday xavotirlar avvalroq Yevropa politsiya agentligi (Europol) tomonidan ham bildirilgan. Europol rahbari tashkilotning rejalari haqida ham ma’lum qilgan. Qurol jinoyatchilar qo‘liga tushmasligi uchun tashkilot xalqaro ishchi guruh tuzishni rejalashtirgan.

Rossiya Federal xavfsizlik xizmatining Chegara xizmati rahbari Vladimir Kulishovning so‘zlariga ko‘ra, so‘nggi sakkiz yil ichida rossiyalik chegarachilar Ukraina bilan chegarada umumiy qiymati 500 million rubldan ortiq o‘qotar qurollar, o‘q-dorilar, portlovchi moddalar va kontrabandani qo‘lga olgan.

24-fevralda Rossiya Ukrainaga bostirib kirishni boshlaganidan keyin Ukraina Milliy politsiyasi ichki ishlar faxriylari va hududiy mudofaa safiga qo‘shilganlarga qurol-yarog‘ berishga ruxsat berdi.