Xalq deputatlari Andijon shahar kengashi deputati Jahongir Jiyanovning sessiya ishi jonli efirga uzatilmayotganini tanqid qilgani va sessiya ishida raislik qiluvchining e’tiroziga sabab bo‘lgani xabar berilgandi. “Daryo” muxbiri mazkur holat yuzasidan deputat Jahongir Jiyanov bilan suhbatlashib, masalaga oydinlik kiritishga urindi.
O‘zLiDeP partiyasi vakili, shahar Kengashi deputati Jahongir Jiyanovning ma’lum qilishicha, xalq deputatlari Andijon shahar Kengashining oltinchi chaqiriq 29-sessiyasida kun tartibida beshta masala bo‘lgan. Ammo sessiyani olib borgan rais hech qanday ogohlantirishsiz oltinchi masalani o‘rtaga tashlab, ovoz berilishini so‘ragan.
“Xabaringiz bor, 2021-yil 1-dekabrda davlat tashkilotlarida ochiqlik, oshkoralik siyosati to‘g‘risida prezident farmoni qabul qilingan. Farmonda aniq ko‘rsatib qo‘yilganidek mahalliy kengash sessiyalari majburiy tarzda ijtimoiy tarmoqlar orqali jonli efirga uzatib borilishi kerak. Bu Korrupsiyaga qarshi kurashish agentligi hisobotida ham e’lon qilingan. Kuni kecha o‘tgan 29-sessiyamizga qaytadigan bo‘lsak (mazkur sessiyada jonli efir qilinmayotganini tanqid qilgan deputat sessiyadan chiqarib yuborilgandi) prezident farmonida aytilgan sanadan boshlab o‘tkazilgan so‘nggi to‘rtta sessiya ham amalda belgilangan tartibda o‘tkazilmadi. Ommaviy axborot vositalari vakillari chaqirilgan bo‘lsa ham, ular rasmiy ravishda taklif qilinmadi. Bundan tashqari o‘zimizning ijtimoiy tarmoqlardagi sahifalarimizda ham jonli efirlar tashkil qilinmadi. Bunga sabab deputatlarimizning ichki senzurasi yuqori ekanligi desam mubolag‘a bo‘lmaydi”, — deydi deputat “Daryo” muxbiri bilan suhbatda.
Deputat xalq vakillari xalqdan hech qanday gapni yashirmasligi kerak degan fikrni aytmoqda.
“O‘zimiz xalq vakili bo‘la turib, xalqdan nimani yashiramiz, hayronman. Deputatlar joylarda ishlamaydi, xalqni qabul qilmaydi, muammolarga befarq deb xalq ko‘p e’tiroz bildiradi. Albatta, bular haqli e’tiroz. Chunki biz o‘zimizning qilayotgan ishlarimizni yorita olmaymiz. Bizda matbuot xizmatning o‘zi yo‘q. Aslida ishlamagan odam bahona qidirsa topaveradi. Xalq bizga ishonch bildirib deputatlikka sayladimi, ishonchni oqlashimiz va qilayotgan ishlarimizni ijtimoiy tarmoqlarda faol bo‘lib, yoritib borishimiz kerak”, — deydi suhbatdosh.
Jahongir Jiyanovning aytishicha, o‘sha kungi sessiya kun tartibida beshta masala bo‘lgan. Ammo raislik etuvchi oltinchi masalani tasdiqlatishga uringan.
“29-sessiyaning kun tartibida beshta masala bor edi. Ushbu masalalar qonuniy tartibda deputatlarga yetti kun oldin taqdim qilingandi. Lekin sessiya mobaynida oltinchi masala ham o‘rtaga qo‘yildi. Ammo bu bo‘yicha deputatlarga qonunga muvofiq tarzda biror hujjat berilmadi. Sessiya raisi esa masalani ovozga qo‘yib, tasdiqlatishga urindi. Masala birinchi martada yetarli ovoz ololmagach, yana bir bor ovozga qo‘yildi. Bu esa umuman sessiya o‘tkazish tartibiga zid. Vaholanki, bir marta ovozga qo‘yilganda tasdiqlanmagan masala ikkinchi marta qo‘yilmaydi. Ammo rais masala tasdiqlanmaguncha ovoz berishni to‘xtatmadi. Buni biz mutlaqo qonun buzilishi deb bilamiz”, — deydi deputat suhbatdosh.
Deputatning aniqlik kiritishicha, sessiyaga raislik qiluvchi Shahobiddin Haydarov sessiya kun tartibiga oltinchi masala sifatida shahar hokimi Bahrom Haydarovning deputatlik daxlsizligini bekor qilishni so‘rab, deputatlarga yuzlangan.
“Prezidentimiz minbarlarda turib ochiqlik, oshkoralik haqida ko‘p gapiradi. Ammo Andijon shahri deputatlari jamoatchilikdan qochadi. Nega deputat o‘zi saylagan xalqqa hisobot bermaydi? Nega jurnalist, blogerlarning savollariga javob bermaydi? Nega sessiyada imi-jimida masalani tasdiqlatishga urinishadi?”, — deydi Jahongir Jiyanov.
Jiyanovning aytishicha, avvalgi sessiyalarda ham deputatlarning telefonlarni olib qo‘yish bo‘yicha topshiriqlar berilgan.
“O‘tgan galgi sessiyalarda ham telefonlarni olib qo‘yish kabi ayrim taqiqlar qo‘yilgandi. Bu holatlar juda ko‘p kuzatilgan. Tegishli tashkilotlar bunga izoh bergan. Ammo Senat negadir e’tiborsiz qoldirmoqda. So‘nggi sessiya ham noqonuniy tarzda o‘tkazildi. Jumladan, sessiya tartibiga kiritilgan masalalar muhokama qilinmadi. Aksincha, oltinchi masala o‘qib eshittirildi. Shunday bo‘lsa ham bu mavzu bo‘yicha mana uch kundirki deputatlarning qo‘liga biror ma’lumot yoki hujjatlar taqdim etilmadi. Nimani, nega yashirishayotgani esa bizga qorong‘u?”, — deydi deputat.
Izoh (0)