O‘zbekistonda ko‘p kvartirali uylarga tutash yerlarda o‘zboshimchalik bilan inshootlar qurganlik uchun javobgarlik kuchaytirildi

O‘zbekistonda ko‘p kvartirali uylar konstruksiyalarini noqonuniy o‘zgartirganlik uchun javobgarlik kuchaytirildi, deb xabar bermoqda Telegram’dagi “Huquqiy axborot” kanali.

Ma’lum qilinishicha, 31-may kuni prezident tomonidan imzolangan qonun bilan Ma’muriy javobgarlik to‘g‘risidagi hamda Soliq kodekslariga o‘zgartirishlar kiritildi.

Unga ko‘ra:

Ko‘p kvartirali uylarni boshqarish qoidalarini buzish mansabdor shaxslarga BHMning 15 baravari (4 million 500 ming so‘m) miqdorida jarima solishga sabab bo‘ladi.

Ko‘p kvartirali uylardagi tayanch va (yoki) to‘siq konstruksiyalarni qonunchilikni hamda texnik jihatdan tartibga solish sohasidagi normativ hujjatlarni buzgan holda o‘zgartirish va (yoki) rekonstruksiya qilish, shu jumladan, ko‘p kvartirali uylarda va ko‘p kvartirali uylarga tutash yer uchastkalarida o‘zboshimchalik bilan imoratlar (inshootlar) qurish ishlarini amalga oshirish:

• fuqarolarga BHMning 30 baravarigacha (9 million so‘mgacha);
• mansabdor shaxslarga 50 baravarigacha (15 million so‘mgacha) miqdorda jarima solishga sabab bo‘ladi.

Ma’muriy huquqbuzarlik to‘g‘risidagi ishlar Uy-joy kommunal xizmat ko‘rsatish vazirligi huzuridagi Ko‘p kvartirali uy-joy fondidan foydalanish sohasini nazorat qilish inspeksiyasi tomonidan ko‘rib chiqiladi.

Qonun bilan Soliq kodeksiga kiritilgan o‘zgartirishlarga ko‘ra:

boshqaruvchi tashkilotlar yoki ko‘p kvartirali uylarni boshqaruvchilar tomonidan umumiy mol-mulkni boshqarish, unga texnik xizmat ko‘rsatish va uni ta’mirlash, shuningdek, ko‘p kvartirali uylarga tutash yer uchastkalarini obodonlashtirish bo‘yicha ko‘rsatilayotgan xizmatlar hamda bajarilayotgan ishlar bo‘yicha aylanma soliq solishdan ozod etiladi; bu bo‘yicha ko‘rsatilgan xizmatlardan hamda bajarilgan ishlardan olingan mablag‘lar soliqqa tortilmaydi.

Ushbu qonun rasmiy e’lon qilingan kundan e’tiboran kuchga kiradi.

Uy-joy kommunal xizmat ko‘rsatish vazirligi inspeksiyasi boshlig‘i Azlarjon Sodiqov “Daryo” muxbiriga bergan intervyusida O‘zbekistonda ko‘p qavatli uylarda qurilish qilishning qonuniy tartiblari bo‘lsa-da, unga ko‘p fuqarolar amal qilmasligini aytgandi. Uning so‘zlariga ko‘ra, Respublikada mavjud 40 mingtaga yaqin ko‘p qavatli uylarda 60 mingdan ortiq noqonuniy qurilmalar bor.

“Noqonuniy qurilmalar nimalardan iborat? Misol uchun, ko‘p kvartirali uyning 1-qavatida qo‘shimcha qurilish qilish, ya’ni balkonni yanada tashqariga chiqarish, yerto‘ladan tashqari tomondan eshik ochish, ‘podyezd’larni o‘rab olinishi, tom qismlariga tasdiqlanmagan hujjatlarsiz qurilmalar qurish, yerto‘lalardan tartibsiz foydalanish kabilar noqonuniy qurilmalar hisoblanadi.

Bundan tashqari, juda ko‘p kuzatiladigan muammo – uyning ichiga noqonuniy qurilmalar qurish holatlaridir. Masalan, aksariyat fuqarolar oshxonani balkonga ko‘chiradi. Albatta, bu noqonuniy hisoblanadi. Yana kimdir devorni olib tashlab zalni balkon bilan ulab yuboradi. Bu ham qonunga hilof qurilishdir. Aytish kerakki, bunday qurilishlarning barchasini hujjatlarni rasmiylashtirgan, xavfsizligiga ishonch hosil qilgan holda, loyiha doirasida va loyihaning tegishli mutasaddilaridan tasdiqlatib amalga oshirish maqsadga muvofiq bo‘ladi. Qonunchilikda bunday uylarni rekonstrutsiya qilishning o‘z tartiblari bor. Unga amal qilgan holda ishni tashkil etish lozim”, – degan edi vazirlik vakili.

Tanzila Norboyeva Senatning 25-yalpi majlisida mazkur qonunning hayotga tatbiq etilishi natijasida kommunal xizmat ko‘rsatish sohasida, shu jumladan, ko‘p kvartirali uylarni saqlash va undan foydalanishda qonun buzilish holatlarini oldini olishga hamda aholining xavfsiz yashashiga sharoit yaratib berilishiga erishilishini ta’kidlagandi.