Халқ депутатлари Андижон шаҳар кенгаши депутати Жаҳонгир Жияновнинг сессия иши жонли эфирга узатилмаётганини танқид қилгани ва сессия ишида раислик қилувчининг эътирозига сабаб бўлгани хабар берилганди. «Дарё» мухбири мазкур ҳолат юзасидан депутат Жаҳонгир Жиянов билан суҳбатлашиб, масалага ойдинлик киритишга уринди.
ЎзЛиДеП партияси вакили, шаҳар Кенгаши депутати Жаҳонгир Жияновнинг маълум қилишича, халқ депутатлари Андижон шаҳар Кенгашининг олтинчи чақириқ 29-сессиясида кун тартибида бешта масала бўлган. Аммо сессияни олиб борган раис ҳеч қандай огоҳлантиришсиз олтинчи масалани ўртага ташлаб, овоз берилишини сўраган.
«Хабарингиз бор, 2021 йил 1 декабрда давлат ташкилотларида очиқлик, ошкоралик сиёсати тўғрисида президент фармони қабул қилинган. Фармонда аниқ кўрсатиб қўйилганидек маҳаллий кенгаш сессиялари мажбурий тарзда ижтимоий тармоқлар орқали жонли эфирга узатиб борилиши керак. Бу Коррупцияга қарши курашиш агентлиги ҳисоботида ҳам эълон қилинган. Куни кеча ўтган 29-сессиямизга қайтадиган бўлсак (мазкур сессияда жонли эфир қилинмаётганини танқид қилган депутат сессиядан чиқариб юборилганди) президент фармонида айтилган санадан бошлаб ўтказилган сўнгги тўртта сессия ҳам амалда белгиланган тартибда ўтказилмади. Оммавий ахборот воситалари вакиллари чақирилган бўлса ҳам, улар расмий равишда таклиф қилинмади. Бундан ташқари ўзимизнинг ижтимоий тармоқлардаги саҳифаларимизда ҳам жонли эфирлар ташкил қилинмади. Бунга сабаб депутатларимизнинг ички цензураси юқори эканлиги десам муболаға бўлмайди», — дейди депутат «Дарё» мухбири билан суҳбатда.
Депутат халқ вакиллари халқдан ҳеч қандай гапни яширмаслиги керак деган фикрни айтмоқда.
«Ўзимиз халқ вакили бўла туриб, халқдан нимани яширамиз, ҳайронман. Депутатлар жойларда ишламайди, халқни қабул қилмайди, муаммоларга бефарқ деб халқ кўп эътироз билдиради. Албатта, булар ҳақли эътироз. Чунки биз ўзимизнинг қилаётган ишларимизни ёрита олмаймиз. Бизда матбуот хизматнинг ўзи йўқ. Аслида ишламаган одам баҳона қидирса топаверади. Халқ бизга ишонч билдириб депутатликка сайладими, ишончни оқлашимиз ва қилаётган ишларимизни ижтимоий тармоқларда фаол бўлиб, ёритиб боришимиз керак», — дейди суҳбатдош.
Жаҳонгир Жияновнинг айтишича, ўша кунги сессия кун тартибида бешта масала бўлган. Аммо раислик этувчи олтинчи масалани тасдиқлатишга уринган.
«29-сессиянинг кун тартибида бешта масала бор эди. Ушбу масалалар қонуний тартибда депутатларга етти кун олдин тақдим қилинганди. Лекин сессия мобайнида олтинчи масала ҳам ўртага қўйилди. Аммо бу бўйича депутатларга қонунга мувофиқ тарзда бирор ҳужжат берилмади. Сессия раиси эса масалани овозга қўйиб, тасдиқлатишга уринди. Масала биринчи мартада етарли овоз ололмагач, яна бир бор овозга қўйилди. Бу эса умуман сессия ўтказиш тартибига зид. Ваҳоланки, бир марта овозга қўйилганда тасдиқланмаган масала иккинчи марта қўйилмайди. Аммо раис масала тасдиқланмагунча овоз беришни тўхтатмади. Буни биз мутлақо қонун бузилиши деб биламиз», — дейди депутат суҳбатдош.
Депутатнинг аниқлик киритишича, сессияга раислик қилувчи Шаҳобиддин Ҳайдаров сессия кун тартибига олтинчи масала сифатида шаҳар ҳокими Баҳром Ҳайдаровнинг депутатлик дахлсизлигини бекор қилишни сўраб, депутатларга юзланган.
«Президентимиз минбарларда туриб очиқлик, ошкоралик ҳақида кўп гапиради. Аммо Андижон шаҳри депутатлари жамоатчиликдан қочади. Нега депутат ўзи сайлаган халққа ҳисобот бермайди? Нега журналист, блогерларнинг саволларига жавоб бермайди? Нега сессияда ими-жимида масалани тасдиқлатишга уринишади?», — дейди Жаҳонгир Жиянов.
Жияновнинг айтишича, аввалги сессияларда ҳам депутатларнинг телефонларни олиб қўйиш бўйича топшириқлар берилган.
«Ўтган галги сессияларда ҳам телефонларни олиб қўйиш каби айрим тақиқлар қўйилганди. Бу ҳолатлар жуда кўп кузатилган. Тегишли ташкилотлар бунга изоҳ берган. Аммо Сенат негадир эътиборсиз қолдирмоқда. Сўнгги сессия ҳам ноқонуний тарзда ўтказилди. Жумладан, сессия тартибига киритилган масалалар муҳокама қилинмади. Аксинча, олтинчи масала ўқиб эшиттирилди. Шундай бўлса ҳам бу мавзу бўйича мана уч кундирки депутатларнинг қўлига бирор маълумот ёки ҳужжатлар тақдим этилмади. Нимани, нега яширишаётгани эса бизга қоронғу?», — дейди депутат.
Изоҳ (0)