“Prezident gapiradi, ammo deputatlarimiz amal qilmaydi”. Andijonlik deputat sessiya ishi jonli efirga uzatilmayotganini tanqid qildi

Xalq deputatlari Andijon shahar kengashi deputati sessiya ishi jonli efirga uzatilmayotganini tanqid qildi. Va sessiya ishida raislik qiluvchining e’tiroziga sabab bo‘ldi.

“Sessiyaga raislik qiluvchi sifatida sizni ogohlantiraman, telefoningizni o‘chirib qo‘ying. Yo‘qsa sizni sudga beramiz”, — deydi sessiya ishi boshlangan paytda jonli efir qilayotgan deputatga murojaat qilgan mas’ul.

Shahar kengashi deputati Jahongir Jiyanov esa sessiyada o‘tirgan deputatlar xalq vakili ekanini, shu bois sessiya ishini xalqdan yashirmay, jonli efir qilish tarafdori ekanini aytib, telefonini o‘chirmasligini aytadi.

“Prezidentimiz farmonida sessiyani jonli efir orqali xalqqa ko‘rsatish talabi qo‘yilgan. Nega endi siz prezident farmoniga qarshi chiqyapsiz? Prezidentimiz talab qilyapti, ammo deputatlarimiz bunga amal qilmayapti”, — deydi deputat.

Sessiyaga raislik qiluvchi deputatning bu gapiga javoban sessiya ishi shahar hokimligi axborot xizmati tomonidan yoritib borilayotganini aytadi. Deputat esa, shahar hokimligi axborot xizmati sessiya ishidan jonli efir qilmayotganini bildiradi.

Andijon shahar hokimligi axborot xizmati rahbarining “Daryo” muxbiriga bildirishicha, mazkur sessiya 2022-yilning 28-may kuni bo‘lib o‘tgan bo‘lib, aynan shu sessiyadan jonli efir qilinmagan.

“Bundan avval barcha sessiya ishlaridan jonli efir qilib borardik. Aynan shu sessiyada videoga oldik, ammo jonli efir qilolmadik”, — deydi hokimlik axborot xizmati mas’uli.

Ma’lum bo‘lishicha, sessiya haqida shahar hokimligining rasmiy kanallarida biror-bir axborot berilmagan.

Ijtimoiy tarmoqlar orqali tarqalgan videodan anglashilishicha, Andijondagi sessiya avvalida mazkur jarayonga viloyat kengashi deputati ham aralashib, sessiya ishida ekspert sifatida ishtirok etayotganini aytib, sessiyani jonli efir orqali jamoatchilikka uzatishda mentalitetdan kelib chiqish lozimligini bildiradi.

“Daryo” muxbiri mazkur holat yuzasidan deputat Jahongir Jiyanov bilan suhbatlashib, masalaga oydinlik kiritishga urinmoqda. Tez orada voqea haqida deputatning o‘zi batafsil ma’lumot beradi.