Buxoro viloyati bojxona boshqarmasi tezkor xodimlari tomonidan yirik miqdordagi xorij valyutasini chegara-postidan olib chiqishga uringan shaxslar qo‘lga olindi. Bu haqda “Daryo”ga viloyat Bojxona boshqarmasi matbuot xizmati rahbari xabar berdi.
Ta’kidlanishicha, “Buxoro aeroporti” chegara bojxona posti orqali xorij davlatiga otlangan O‘zbekiston fuqarolari T.Q., S.F. va S.A.ning yashil yo‘lakdagi xatti-harakatlari bojxonachilar e’tiborini tortgan. Va ushbu shaxslar o‘rnatilgan tartibda bojxona nazoratdan o‘tkazilgan.
Natijada ushbu fuqarolarning egnidagi kostyumi hamda shimlarining ichki cho‘ntaklarida yo‘lovchi bojxona deklaratsiyasida yozib ko‘rsatilmagan va bojxonachilarning og‘zaki so‘rovida ma’lum qilinmagan jami 27 ming AQSH dollari qiymatidagi naqd xorijiy valyutalar topilgan. Ularning xorijiy valyutalarning noqonuniy olib chiqib ketish rejasiga chek qo‘yilgan.
O‘tkazilgan so‘rovda fuqarolar ushbu xorijiy valyutalar notanish shaxs tomonidan respublika hududidan olib chiqish uchun berilganini bildirishgan.
Qo‘shimcha ma’lumot berilishicha, 2022-yilning shu davriga qadar viloyatda ekvivalenti 1 milliard 576 million so‘mga teng naqd xorijiy valyutalarning noqonuniy olib o‘tilishiga chek qo‘yilgan.
Izoh (0)