Бухоро вилояти божхона бошқармаси тезкор ходимлари томонидан йирик миқдордаги хориж валютасини чегара-постидан олиб чиқишга уринган шахслар қўлга олинди. Бу ҳақда «Дарё»га вилоят Божхона бошқармаси матбуот хизмати раҳбари хабар берди.
Таъкидланишича, «Бухоро аэропорти» чегара божхона пости орқали хориж давлатига отланган Ўзбекистон фуқаролари Т.Қ., С.Ф. ва С.А.нинг яшил йўлакдаги хатти-ҳаракатлари божхоначилар эътиборини тортган. Ва ушбу шахслар ўрнатилган тартибда божхона назоратдан ўтказилган.
Натижада ушбу фуқароларнинг эгнидаги костюми ҳамда шимларининг ички чўнтакларида йўловчи божхона декларациясида ёзиб кўрсатилмаган ва божхоначиларнинг оғзаки сўровида маълум қилинмаган жами 27 минг АҚШ доллари қийматидаги нақд хорижий валюталар топилган. Уларнинг хорижий валюталарнинг ноқонуний олиб чиқиб кетиш режасига чек қўйилган.
Ўтказилган сўровда фуқаролар ушбу хорижий валюталар нотаниш шахс томонидан республика ҳудудидан олиб чиқиш учун берилганини билдиришган.
Қўшимча маълумот берилишича, 2022 йилнинг шу даврига қадар вилоятда эквиваленти 1 миллиард 576 миллион сўмга тенг нақд хорижий валюталарнинг ноқонуний олиб ўтилишига чек қўйилган.
Изоҳ (0)