O‘zbekistonda ichimlik suvi ta’minoti og‘ir holatdagi 1545 ta mahalla suv bilan ta’minlanadi

AOKAda “O‘zsuvta’minot” AJ rahbariyati ishtirokida o‘tkazilgan matbuot anjumanida sohaga oid amalga oshiriladigan ishlar to‘g‘risida ma’lumot berildi.

Qayd etilishicha, “Aholining ichimlik suv ta’minoti va oqova suv xizmatlari bilan ta’minlanganlik darajasini oshirish bo‘yicha qo‘shimcha chora-tadbirlar to‘g‘risida”gi prezident qarori imzolangan. Unga ko‘ra, respublikadagi ichimlik suvi ta’minoti og‘ir holatdagi 1 545 mahalla (shundan 2022-yilda 140 ta) ichimlik suv bilan ta’minlanadi. Buning uchun mahalliy budjetlardan jami 444,6 milliard so‘m, shu jumladan joriy yilda 106,3 milliard so‘m mablag‘ ajratiladi.

1 691 ta maktab, 885 ta maktabgacha ta’lim tashkilotlari hamda 377 ta tibbiyot muassasalari ichimlik suvi bilan ta’minlanadi. Buning uchun joriy yilda jami 50 milliard so‘m, 2023-yildan har yili 50 milliard so‘mdan, jami 100 milliard so‘m ajratilishi ko‘zda tutilgan.

Shuningdek, 2023-yil 1-yanvardan:

• aholiga qiyoslash muddati tugagan suv hisoblagichlarni yangisiga almashtirish “O‘zsuvta’minot” AJ va hududiy suv ta’minoti korxonalarining mablag‘lari hisobidan amalga oshiriladi;
• respublika hududiga texnik talablarga javob bermaydigan suv hisoblagichlarni va ularning qo‘shimcha vositalarini olib kirish hamda o‘rnatish taqiqlanadi;
• ichimlik suvi ta’minoti obyektlari foydalanishga tayyor holda topshirilgan taqdirda (o‘lchov uskunalari o‘rnatilib, ichimlik suv uy xo‘jaligigacha yetkazilgan taqdirda) aholining ixtiyoriga ko‘ra davlat xizmatlari markazlari orqali yoki “O‘zsuvta’minot” AJ bilan to‘g‘ridan-to‘g‘ri shartnoma tuzishga va o‘lchov uskunalarini tamg‘alashga ruxsat beriladi.