O‘zbekistondagi 62 ta davlat oliy ta’lim muassasalarining 2021-yil yakuniga ko‘ra daromadlari va xarajatlari to‘g‘risidagi ma’lumotlar tahlil qilindi, deb xabar beradi Korrupsiyaga qarshi kurashish agentligi.
Natijalar ko‘rsatishicha, respublika kesimida eng ko‘p daromadlar Nizomiy nomidagi Toshkent davlat pedagogika universiteti (qariyb 400 milliard so‘m), Namangan davlat universiteti (320 milliard so‘m) va Mirzo Ulug‘bek nomidagi O‘zbekiston Milliy universiteti tomonidan (315 milliard so‘m) shakllantirilgan.
Toshkent shahrida joylashgan eng ko‘p daromad ko‘rgan oliy ta’lim muassasalarining qisqa ro‘yxati quyidagicha:
- Nizomiy nomidagi Toshkent davlat pedagogika universiteti – 399 milliard so‘m;
- Mirzo Ulug‘bek nomidagi O‘zbekiston Milliy universiteti – 320 milliard so‘m;
- Islom Karimov nomidagi Toshkent davlat texnika universiteti – 276 milliard so‘m;
- Toshkent davlat iqtisodiyot universiteti – 237 milliard so‘m;
- O‘zbekiston davlat jahon tillari universiteti – 210 milliard so‘m.
O‘z navbatida, Korrupsiyaga qarshi kurashish agentligi tomonidan Oliy va o‘rta maxsus ta’lim vazirligiga barcha davlat OTMlarining daromadlari va xarajatlari to‘g‘risidagi ma’lumotlarni belgilangan resurslarda to‘liq joylashtirish hamda doimiy yangilab borish lozimligi tushuntirilgan.
Oliy va o‘rta maxsus ta’lim vazirligining ma’lumotiga ko‘ra, bugungi kunda respublika bo‘yicha oliy ta’lim muassasalari jami 161 ta, ulardan universitetlar – 31 ta, institutlar – 45 ta, akademiyalar – 3 ta, filiallar – 26 ta, Konservatoriya – 1 ta, chet el OTM filiallari – 30 ta, nodavlat oliy ta’lim muassasalari – 25 ta.
Avvalroq oliy ta’lim tizimida qariyb 11,4 milliard so‘mlik moliyaviy xato va kamchiliklar aniqlangani to‘g‘risida xabar berilgandi.
Izoh (0)