Ўзбекистондаги 62 та давлат олий таълим муассасаларининг 2021 йил якунига кўра даромадлари ва харажатлари тўғрисидаги маълумотлар таҳлил қилинди, деб хабар беради Коррупцияга қарши курашиш агентлиги.
Натижалар кўрсатишича, республика кесимида энг кўп даромадлар Низомий номидаги Тошкент давлат педагогика университети (қарийб 400 миллиард сўм), Наманган давлат университети (320 миллиард сўм) ва Мирзо Улуғбек номидаги Ўзбекистон Миллий университети томонидан (315 миллиард сўм) шакллантирилган.
Тошкент шаҳрида жойлашган энг кўп даромад кўрган олий таълим муассасаларининг қисқа рўйхати қуйидагича:
- Низомий номидаги Тошкент давлат педагогика университети – 399 миллиард сўм;
- Мирзо Улуғбек номидаги Ўзбекистон Миллий университети – 320 миллиард сўм;
- Ислом Каримов номидаги Тошкент давлат техника университети – 276 миллиард сўм;
- Тошкент давлат иқтисодиёт университети – 237 миллиард сўм;
- Ўзбекистон давлат жаҳон тиллари университети – 210 миллиард сўм.
Ўз навбатида, Коррупцияга қарши курашиш агентлиги томонидан Олий ва ўрта махсус таълим вазирлигига барча давлат ОТМларининг даромадлари ва харажатлари тўғрисидаги маълумотларни белгиланган ресурсларда тўлиқ жойлаштириш ҳамда доимий янгилаб бориш лозимлиги тушунтирилган.
Олий ва ўрта махсус таълим вазирлигининг маълумотига кўра, бугунги кунда республика бўйича олий таълим муассасалари жами 161 та, улардан университетлар – 31 та, институтлар – 45 та, академиялар – 3 та, филиаллар – 26 та, Консерватория – 1 та, чет эл ОТМ филиаллари – 30 та, нодавлат олий таълим муассасалари – 25 та.
Аввалроқ олий таълим тизимида қарийб 11,4 миллиард сўмлик молиявий хато ва камчиликлар аниқлангани тўғрисида хабар берилганди.
Изоҳ (0)