Qozog‘istonning janubiy poytaxti hisoblangan Olmaota shahrida 2022-yilning 4—7-yanvar kunlari Mang‘istov viloyatida bo‘lib o‘tgan norozilik namoyishlari ortidan ommaviy tartibsizliklar vujudga keldi. “Olmaota fojiasi” nomi bilan tarixda qolgan voqealar har bir qozog‘istonlik xotirasida saqlanib qolgani bor gap. Boisi ushbu voqealar natijasida tinch aholi orasida ham, huquqni muhofaza qiluvchi idora xodimlari orasida ham yuzlab odamlar qurbon bo‘ldi. “Daryo” muxbiri Umidjon Mamarasulov Olmaota shahriga safari chog‘ida janubiy poytaxtning hozirgi ko‘rinishidan fotoreportaj tayyorladi.
4-yanvar kuni janubiy poytaxt aholisi tinch mitingga chiqdi, natijada bu tartibsizliklarga aylanib ketdi. 5-yanvar kuni vaziyat nazoratdan chiqdi. Namoyishchilar shahar binolariga bostirib kirishdi: hokimlik, “Nur Otan” partiyasi bo‘limi, telekanallar idoralari, prezident qarorgohi va aeroport jabr ko‘rdi. Namoyishchilar Olmaotadagi Ko‘kto‘be teleminorasini ham egallab olishga uringan. Tartibsizliklar oqibatida eng ko‘p Olmaota hokimligi va prezident qarorgohi binolari zarar ko‘rgan.
Prezident qarorgohi Sovet davrida Lenin muzeyi majmuasi sifatida loyihalashtirilgan bo‘lib, 1983-yilda qurila boshlangan. Ammo oradan uch yil o‘tgach, deyarli 90 foizi tayyor obyektning qurilishi to‘xtatilgan. 1993-yilda qurilish ishlari qayta tiklanib, binoning foydalanish maqsadi o‘zgaradi. 1995-yilda bino Qozog‘iston prezidentining qarorgohi sifatida foydalanishga topshirilgan.
Biroq 1997-yilda Qozog‘iston poytaxti Aqmo‘laga (hozirgi Nur-Sulton) ko‘chirilishi ortidan bino 2022-yilning 1-yanvariga qadar prezident qarorgohi maqomini saqlab qolgan holda Qozog‘iston prezidenti va boshqa davlatlar rahbarlarining Olmaotaga tashriflari chog‘ida tadbirlar o‘tkazish uchun foydalanilib kelinar edi.
Yanvar fojialarida qarorgohga jiddiy zarar yetgan. Uni qayta tiklashning imkoni qolmagani sababli Qosim Jo‘mart To‘qayev qarorgoh o‘rnida xiyobon tashkil etish topshirig‘ini bergan. Ayni paytda qarorgohni buzish ishlari davom etmoqda.
Olmaota shahar hokimligi binosi 1980—1991-yillarda — Qozog‘iston kompartiyasi markaziy qo‘mitasi, 1991—1994-yillarda esa Qozog‘iston Respublikasi prezidenti qarorgohi vazifasini bajargan. 1994-yildan buyon binoda shahar hokimligi joylashtirilgan.
5-yanvar kuni o‘tgan tartibsizliklar vaqtida binoga o‘t qo‘yilgan. Ayni paytda binoda restavratsiya va rekonstruksiya qilish ishlari olib borilmoqda.
Ta’kidlash joizki, bugungi kunda shahar amalda o‘zining normal hayotiga qaytdi, ta’mirlash ishlari jadal olib borilmoqda.
Izoh (0)