Buxoroga sifati kafolatlanmagan dori-darmonlarning olib kirilayotgani aniqlandi

Buxoroda tibbiy buyumlarni noqonuniy oldi-sotdisi bilan shug‘ullanib, sifati kafolatlanmagan dori-darmonlarning olib kirilayotgani aniqlandi. Bu haqda “Daryo”ga viloyat Bojxona boshqarmasi matbuot xizmati rahbari Javohir Ismoilov xabar berdi.

Ta’kidlanishicha, Kontrabandaga qarshi kurashish va bojxona auditi bo‘limi xodimlari, ichki ishlar boshqarmasi va Milliy gvardiyaning viloyatdagi boshqarmasi xodimlari bilan hamkorlikda G‘ijduvon tumanidagi “Sarmijoy” chegara postida nazorat tadbiri o‘tkazilgan.

O‘tkazilgan tezkor tadbir davomida “Sarmijoy” postida fuqaro K.N. boshqaruvidagi Isuzu avtoulovida tegishli hujjatlari bo‘lmagan, xorijda ishlab chiqarilgan jami 63 turdagi, umumiy qiymati 200 million so‘mlik har xil turdagi sifati kafolatlanmagan dori vositalari olib kirilayotgani aniqlangan.

Xuddi shu kuni “Olot” chegara bojxona postida aniqlangan holatda qo‘shni davlatdan kirib kelgan yukli transport vositasi inspeksion ko‘rik majmuasi orqali bojxona nazoratidan o‘tkazilgan. Natijada fuqaro P.Sh. avtomashinasida yuk kuzatuv hujjatlarida ko‘rsatilmagan, umumiy qiymati 164 million so‘mlik 6 o‘rinda, 208 o‘ramdagi “Perla” yozuvli nam salfetka va bolalar tagliklari tovarlarini yashirincha olib o‘tishga urinayotgani oldi olingan.

Bundan tashqari, P.Sh. boshqaruvidagi yuk avtomobilida yuk kuzatuv hujjatlarida ko‘rsatilganidan ortiqcha umumiy qiymati 96 million so‘mlik 13 800 dona soqol olishda ishlatiladigan britva tovarlari borligi aniqlangan.

“Noqonuniyligi yetmaganidek, sifati kafolatlanmagan dori-darmonlarning olib kirishga urinishayotgani inson salomatligiga xiyonat. Raqamlarga ko‘ra, viloyat bojxona boshqarmasi tomonidan joriy yilning o‘tgan davri mobaynida 283 ta holatda, umumiy qiymati 56,1 milliard so‘mlik dori-darmonlar va tovar-moddiy boyliklari bilan bog‘liq huquqbuzarliklar aniqlandi. Hozirgi vaqtda holat yuzasidan bojxona organlari tomonidan surishtiruv harakatlari olib borilmoqda”, – dedi Javohir Ismoilov.