Бузиб ташланаётган президент қароргоҳи ва таъмирланаётган шаҳар ҳокимлиги биноси: Январь воқеаларидан кейинги Олмаота шаҳридан фоторепортаж

Қозоғистоннинг жанубий пойтахти ҳисобланган Олмаота шаҳрида 2022 йилнинг 4—7 январь кунлари Манғистов вилоятида бўлиб ўтган норозилик намойишлари ортидан оммавий тартибсизликлар вужудга келди. «Олмаота фожиаси» номи билан тарихда қолган воқеалар ҳар бир қозоғистонлик хотирасида сақланиб қолгани бор гап. Боиси ушбу воқеалар натижасида тинч аҳоли орасида ҳам, ҳуқуқни муҳофаза қилувчи идора ходимлари орасида ҳам юзлаб одамлар қурбон бўлди. «Дарё» мухбири Умиджон Мамарасулов Олмаота шаҳрига сафари чоғида жанубий пойтахтнинг ҳозирги кўринишидан фоторепортаж тайёрлади.

4 январь куни жанубий пойтахт аҳолиси тинч митингга чиқди, натижада бу тартибсизликларга айланиб кетди. 5 январь куни вазият назоратдан чиқди. Намойишчилар шаҳар биноларига бостириб киришди: ҳокимлик, «Нур Отан» партияси бўлими, телеканаллар идоралари, президент қароргоҳи ва аэропорт жабр кўрди. Намойишчилар Олмаотадаги Кўктўбе телеминорасини ҳам эгаллаб олишга уринган. Тартибсизликлар оқибатида энг кўп Олмаота ҳокимлиги ва президент қароргоҳи бинолари зарар кўрган.

Президент қароргоҳи Совет даврида Ленин музейи мажмуаси сифатида лойиҳалаштирилган бўлиб, 1983 йилда қурила бошланган. Аммо орадан уч йил ўтгач, деярли 90 фоизи тайёр объектнинг қурилиши тўхтатилган. 1993 йилда қурилиш ишлари қайта тикланиб, бинонинг фойдаланиш мақсади ўзгаради. 1995 йилда бино Қозоғистон президентининг қароргоҳи сифатида фойдаланишга топширилган.

Бироқ 1997 йилда Қозоғистон пойтахти Ақмўлага (ҳозирги Нур-Султон) кўчирилиши ортидан бино 2022 йилнинг 1 январига қадар президент қароргоҳи мақомини сақлаб қолган ҳолда Қозоғистон президенти ва бошқа давлатлар раҳбарларининг Олмаотага ташрифлари чоғида тадбирлар ўтказиш учун фойдаланилиб келинар эди.

Январь фожиаларида қароргоҳга жиддий зарар етган. Уни қайта тиклашнинг имкони қолмагани сабабли Қосим Жўмарт Тўқаев қароргоҳ ўрнида хиёбон ташкил этиш топшириғини берган. Айни пайтда қароргоҳни бузиш ишлари давом этмоқда.

Олмаота шаҳар ҳокимлиги биноси 1980—1991 йилларда — Қозоғистон компартияси марказий қўмитаси, 1991—1994 йилларда эса Қозоғистон Республикаси президенти қароргоҳи вазифасини бажарган. 1994 йилдан буён бинода шаҳар ҳокимлиги жойлаштирилган.

5 январь куни ўтган тартибсизликлар вақтида бинога ўт қўйилган. Айни пайтда бинода реставрация ва реконструкция қилиш ишлари олиб борилмоқда.

Таъкидлаш жоизки, бугунги кунда шаҳар амалда ўзининг нормал ҳаётига қайтди, таъмирлаш ишлари жадал олиб борилмоқда.