Markaziy bank oilaviy tadbirkorlikni rivojlantirish dasturlari doirasida imtiyozli kreditlar olish, hokim yordamchilari tomonidan berilayotgan tavsiyalar, ta’minot bilan bog‘liq holatlar holatlar haqida ma’lumot berdi.
Oilaviy tadbirkorlikni rivojlantirish dasturlari doirasida imtiyozli kreditlar yillik 14 foiz stavkada beriladi. Bunday kreditlar Markaziy bank asosiy stavkasiga bog‘lanmagan.
Umumiy tartibda asosiy qarz bo‘yicha 3 oydan 6 oygacha bo‘lgan imtiyozli davr bilan 3 yilgacha muddatga ajratiladi.
Dasturlar doirasida imtiyozli kreditlar:
- chorvachilik (qoramol, qo‘y, echki), baliqchilik va parrandachilik (tuxum yo‘nalishi) uchun – 1 yilgacha imtiyozli davr bilan 3 yilgacha muddatga;
- bog‘dorchilik, uzumchilik va limonchilikni tashkil etish, issiqxona, qishloq xo‘jaligi texnikasi va asbob-uskunalarni xarid qilish uchun –
- 3 yilgacha imtiyozli davr bilan 7 yilgacha muddatga;
- “Hunarmand” uyushmasi a’zolariga — 3 yilgacha muddatga hamda aylanma mablag‘larini to‘ldirish uchun 18 oygacha muddatga ajratiladi.
Qarordan kelib chiqib, joriy yilda beriladigan kreditlarning asosiy qismi avval berilgan kreditlarning qaytarilishi hisobiga beriladi.
Agar kreditlar o‘z vaqtida so‘ndirilmasa, qaytmagan qismiga mos ravishda kredit ajratish imkoniyati cheklanadi.
Qaror bo‘yicha tadbirkorlik tashabbusiga ega jismoniy shaxslarga 33 mln so‘mgacha bo‘lgan miqdorda kredit hokim yordamchisining tavsiyanomasi bilan beriladi.
Bundan tashqari belgilangan tartibda davlat ro‘yxatidan o‘tgan kichik tadbirkorlik subyektlariga uchinchi shaxs kafilligi, sug‘urta polislari, kredit hisobiga sotib olinayotgan mol-mulklar garovi va boshqa ta’minot turlari asosida 225 mln so‘mgacha bo‘lgan miqdorda mablag‘ ajratiladi.
225 mln so‘mdan ortiq miqdordagi kreditlar kredit olish istagini bildiruvchi tadbirkorlik subyektlariga hokim yordamchisining tavsiyalariga muvofiq aniq hisob-kitob qilingan holdagi qarori asosida beriladi.
O‘zini o‘zi band qiladigan fuqarolarga ayrim turdagi faoliyatni amalga oshirish (kasanachilik, hunarmandchilik, issiqxona qurish va shu kabilar uchun zaruriy xomashyo, ehtiyot qismi hamda qurilish mollarini sotib olish) maqsadida 5 mln so‘mgacha miqdorda kredit mablag‘lari naqd pulda berilishi mumkin.
Dasturlar doirasida quyidagi maqsadlar uchun kredit ajratilmaydi:
- ilgari olingan kreditlarni yoki har qanday boshqa qarzlarni qaytarish;
- alkogol va tamaki mahsulotlari ishlab chiqarish;
- savdo-vositachilikni amalga oshirish;
- umumiy ovqatlanish tashkilotlarining aylanma mablag‘larini shakllantirish;
- ishlab chiqarish (xizmat ko‘rsatish) maqsadlari uchun ishlatilmaydigan shaxsiy mulkni (mebel, uyali telefon, maishiy texnika va boshqalar) sotib olish;
- yengil avtotransport vositalari (ishlab chiqarish va xizmat ko‘rsatishda ishtirok etuvchi kichik mototransport vositalari bundan mustasno), jumladan, yo‘lovchi tashuvchi avtomobillar sotib olish;
- ma’muriy xarajatlarni to‘lash, jumladan, xizmat avtomobillari ta’minoti;
- bino va inshootlar sotib olish va qurish (“Hunarmand” uyushmasi a’zolari bundan mustasno).
Izoh (0)